Kobe Bryant-a chanchin an la ngaihven zel

LeBron James chuan Kobe Bryant leh a fanu Gianna thihna avanga hrehawm a tih thu a sawi a, LA Lakers legend sulhnu chhunzawm ngei a tum thu a sawi bawk. Bryant leh James hian United States tan kum 2008 leh 2012 khan Olympic-ah khel dunin gold medal an la ve ve. James chuan, "I chanchin ziah tumin ka ṭhu a, nang, ka fanu Gigi leh kan inṭhianṭhatna/ kan unauna/inzawmna ka ngaihtuah hian ka lungchhe takzet. Pathiannia Philadelphia ka chhuahsan dawna kan inbiak kha ka inbiak tawpna chu a ni ta der a, hetiang hi a thleng ang tih ka ngaihtuah phak lo.

Ka tiam duh che chu, i sulhnu hi ka chhunzawm ang. Kan tan hian i hlu takzet a, van aṭangin chakna min pe ang che. Sawi tur tam tak nei mah ila, sawi a rem rih lo. Kan hun tawn mek hi paltlang harsa ka ti," tiin Bryant-a sulhnu chhunzawm a tum thu a sawi. Lakers hian Inrinni khan Philadelphia 76ers chu 91-108 in an hneh lo. James hian point 29 neiin a career-ah point 33,655 a neihna chiah a ni a, Bryant-a record chu point 12-in a khum. Kum 35 mi James chungah hian Kareem Abdul Jabbar (38,387 pts) leh Karl Malone (36,928 pts) te an la awm. Bryant-a'n Twitter-a thu a ziah hnuhnung ber chu, "King James hma sawn zel ang che. I hnathawh hi ka dah sang hle," tih a ni a, a record khumtu James a fak.

NBA chuan nimin zinga LA Lakers leh Los Angeles Clippers inkhelh hun chu Lakers player hlui Kobe Bryant thihna avangin an sawn. "Lakers chhungkua chungah zahna lantir nan an inkhelh hun hi sawn a ni," tiin NBA chuan thuchhuah an siam. LA Lakers pawhin, "Kan tan hun harsa a ni a, Bryant-a te chhungkua hi kan thlawp chhunzawm zel dawn," tiin thuchhuah an siam ve bawk.

January 26, Pathianni zan dar 11:15 (IST) vela helicopter chesual avangin basketball legend Kobe Bryant, a fanu Gianna leh midang pasarih an thi a. Nimin tlai thleng khan ruang pathum lakchhuah tawh a ni.

LA County medical examiner Dr Jonathan Lucas chuan chhiat tawhna hmun a rualrem loh avangin ruang la chhuak turin hun an mamawh thu a sawi. Helicopter chetsual chhan tak hriat chian a la ni lo a, Bryant-a pilot hlui Kurt Deetz chuan, "An chuanna helicopter 'Sikorsky S-76' hi mi pawimawh bikte chuanna tur a ni a, helicopter rintlak tak a nih avangin a khawl chhiat vang a nih ka ring lo. Khaw chhiat vang zawk a nih ka ring," tiin a sawi.