Saikhamakawn tan khua a var dawn em?

Star Cement MPL13-ah Saikhamakawn FC-in vawiin chhun dar 11:30 hian Dinthar FC an hmachhawn dawn a, Durtlang Football Stadium-a MPL inkhel hmasa ber a ni ang. Inkhel hi Zonet Zawlbuk leh YouTube channel-ah a en theih dawn.

Season liam ta khan Saikhamakawn hian I Day Football final an lut a, MPL-ah erawh champion hial inbeisei mah se round 14-a Aizawl FC an hneh loh avangin knockout stage an lut pha lo.

Kuminah Lalrindika Hmar hoin SKK-in bul an ṭan fuh tawk lo a, MPL match hmasa pahnihah Aizawl FC (5-0) leh kai thar Ramthar Veng (2-1) te an hneh lo. Dinthar lakah SKK-in thawhchhuah an tum dawn a, tlarhnung an tihphui a ṭul ang.

Dinthar FC-in Mizoram Police hneh loin bul ṭan mah se Aizawl West Derby-ah Kanan FC 3-1 in an lehthal. Coach Laldampuia hoten goal thum an khung satliah lo a, inkhel a nung ṭha tel. Maimawms-in season liam ta khan semifinal an khel tawh a, an khelh dan thlirin kuminah nomawi beisei ngam tur an ni.