Chanmari khingpui tur MLS FC

Star Cement MPL13-ah vawiin tlai dar 2:30 hian Chanmari FC leh Lawngtlai club MLS FC te an inkhel dawn. MPL champion lai Chanmari hian squad nei ṭha mah se match hnuhnung berah Mizoram Police-in an chelh a, he result avang hian MLS-in phurna an neih phah ang.

Chanmari hian I Day Football semifinal-ah Aizawl FC an hneh lo a, nomawi an humhim thei lo. Rochhingpuia hoten season liam ta khan MPL champion mah se league round-ah Aizawl FC hnuaiah an awm a, kuminah erawh R. Lalruatfela hote chunga awm an tum dawn.

Mahse, round hnih zawhah Aizawl FC-in goal 10 an khung bakah point ruk an hmu a, table chung berah an awm. Chanmariin point li an hmu a, Aizawl FC hnuaia an awm leh tawh avangin chetsual a thiang tawh lo.

Chanmariin Police an hmachhawn ṭumin ruah a sur nasa a, RG Stadium-ah tui a tlin nasat avangin inkhelh a harsa. Vawiin lamah ruah sur pawh ni se, Durtlang Football Stadium-ah tui a la tling thei lo a, chhuanlam a awm thei lo ang. Chutihrualin Durtlang Football Stadium hi 110m x 68m anga tarlan ni mah se a tling pha lo a, RG Stadium aia a tet avangin MLS tan inven awlsam phah theih ang.

Season liam ta khan MLS hian Chanmari hi 1-0 in an barakhaih a, tun ṭumah erawh Chanmarians hian goal awmchhun khungtu Freddy Lalrinkima bakah defender F. Lalchhanchhuaha an laksak tawh. Lalrozama Fanai enkawl MLS hian player ṭha an chân a, Aizawl FC lakah an mualpho zo chiah. Mahse, AFC laka an chetsualna hi inzirna atana an hmang a nih chuan Chanmari laka point an hlawh theih phahna a ni thei ang.