US Open-ah Djokovic a tla nghal

US Open first round-ah Novak Djokovic chuan Argentine Mariano Navone chu 6-7 (5-7), 7-5, 6-4, 2-6, 1-6 a hneh loin a tla. Serbian star hi a chak loh avangin a mittui a tla a, khawvel tennis player ropui ber zinga mi hi kum 39 mi a nih tawh avangin a vanglai hun a pel tawh tih a chiang ta hle.

Tun ṭum inelnaah hian Djokovic hi seeded no. 4 a ni a, Grand Slam champion vawi 24 zet ni tawh mah se thahrui a ngah tawk tawh lo. Set hmasa ber la lo mah se set thumna zawhin 2-1 in hma a hruai a, mah se set hnuhnung pahnihah thahrui a ngah tawk lo.

Djokovic hi a towel dahna bawmah a luak hial a, a chau tih a chiang. Inkhelh zawhah Djokovic chuan, "Mariano hnehna chan sawi nep sak ka duh lo a, theihtawp chhuah mi a nih avangin ka fak duh. Chutihrualin ka nuam sam lo a ni," tiin a sawi.

Tun ṭum hi US Open first round-a Djokovic tlak hmasa ber a ni a, world no. 1 Jannik Sinner a tel loh bakah champion lai Carlos Alcaraz pawh hliam damkawr a nih avangin mipa inelnaah champion thar an awm a nih pawhin thil mak a ni lo ang.