Al Hilal-ah Watkins a kal ta

Aston Villa striker Ollie Watkins chuan Premier League mangṭhain Saudi Arabia lam a pan ta a, Al Hilal chu pound maktaduai 51-in a zawm - kum thum chhung atan contract a ziak.

Watkins hi Premier League-ah Villa tana goal khung hnem ber niin, goal 91 ngawt a khungsak a, season hman zawh takah pawh khan inelna hrang hrangah match 55 khelin goal 21 a khung.

Kum 30 mi striker hian Villa tan inelna hrang hrangah match 278 khelin, goal 108 a khung a, assist vawi 47 a nei - season hman zawh takah khan Europa League nomawi a chawipui.

Watkins hian chhuah tuma Villa a nawrna kawngah, an league match hmasa bera Brighton & Hove Albion an hmachhawn ṭumin a inlan duh lo a, a hnuah erawh ngaihdam a dil.

English striker chuan, "Villa-a ka hun hmante heti zawng hian a tawp ang tih ka lo ring ngai lo. He club chungah hian kumkhuain ka lawm tawh dawn a, player mai ni lo, ka mimal nunah pawh nasa takin hma ka sawn a ni," a ti.

Hetihlai hian Villa boss Unai Emery chuan, "Ka mittui tlem a tla," tiin a striker chu a ui thu a sawi a, tun nipuiah Villa hian Morgan Rogers, Ezri Konsa, Youri Tielemans, Lucas Digne leh Emiliano Martinez te an lo chhuahtir tawh bawk.

Watkins hian Villa-ah June 2028 thleng contract a la nei a, kar khatah £130,000 a hlawh. Al Hilal-ah hian kar khatah £400,000 a hlawh dawn niin an sawi.