Aizawl Taekwondo Academy an champion

Mizoram Official Taekwondo Championship vawi 28-na leh Mizoram Poomsae Championship vawi 19-na chu neih zawh a ni ta a, a zawna a vawi ruk nan Aizawl Taekwondo Academy an champion - Championship kharna hi Robert Romawia Royte, MLA chuan a hmanpui a ni.

Electric Veng YMA Hall, Aizawl-a neih inelnaah hian Khawzawl District Amateur Taekwondo Association chuan Most Promising Trophy dawngin, Hnamte Taekwondo Club, Venghnuai chuan Best Discipline Team Trophy an dawng thung.

Kyoguri bikah Sports Authority of India chu pakhatna niin Khawzawl DATA in an dawt a, Aizawl Taekwondo Academy te chu pathumna an ni. Poomsae inelnaah Republic Vengthlang Taekwondo Club chu champion-in, Exodus School Taekwondo Club chu pahnihna an ni a, Gidae Taekwondo Club te chu pathumna an ni.

Best Kyorugi Fighter atan Jonathan Lalremruata (ATA) leh Laltlansangi (SAI) te thlan an ni a, Best Poomsae Performer atan Lalthlamuanpuia(Mizoram Police) leh Pansy Rampansangi (Exodus School TC) te chu thlan an ni bawk.

MATA inelna pui ber Official Championship-ah hian Poomsae leh Kyorugi hmanga inel niin, Mizoram district hrang hrang aṭangin team 40 telin player 446 an inlan a ni.