Dan rual lohin Real Madrid an chak

Jose Mourinho enkawl Real Madrid chu hma lam panin an kal zel a, Pathianni zan khan an mikhual Malaga lakah zahngaihna lantir loin 4-0 in an sawp. Real tan Jude Bellingham, Kylian Mbappe leh Arda Guler ten goal khat ṭheuh an khung a, Malaga keeper Alphonso Herrero-a'n an lamah a tilut bawk. Malaga erawhin an mikhualna ramah goal an khung thei lo.

Real an ṭha

Santiago Bernabeu-a inkhelah mualneitu an phur nghal a, Trent Alexander Arnold-a'n chance ṭha a hlah nghal. Mahse goal hmu turin nghah rei a ngai lo a, minute 19-naah Bellingham-a'n defender pathum a tlan pelh hnuah keeper kap karah pet lutin an hmahruaina goal a khung a, player naran tan khung theih a ni lo.

Arnold leh Bellingham an nung chhunzawm a, minute sarih hnu lawkah Arnold-a shot chu Herrero-a'n dang perin a per chu Bellingham-a'n a tauh nghal a, Malaga defender Carlos Puga-a'n lo pet chhuakin Herrero a pet per a, an lamah a lut daihin Real-in an goal hnihna an khung.

Los Blancos an phur laklawh a, minute li hnu lawkah Arnold bawk a inlar. English defender hian ball cross ṭha bik neiin chu Mbappe-a'n tun season-a a goal li nan a khung.

Kum 27 mi Arnold-a'n ball pet thiam bik a ni tih a lantir a, ball-in Mbappe ke a va zawng emaw tih tur khawpa duhthusam a pe. French forward tan goal-a chantir loh chu thil awm lo a ni zawk hial.

Second half-ah pawh Real bawk a chungnung zawkah an ṭang a, injury time-ah counter attack aṭangin Arda Guler-a'n an chak nemnghehna goal a khung a, nuamsa takin Real an chak.

Inkhel chawhnu lamah Real tan Bellingham, Arnold leh Mbappe ten chance an hlah vek a, an vanneih zan ni se goal tam zawk nena chak thei tur an ni.

Mourinho a lawm

Inkhel banah kum 63 mi Mourinho chuan, "Ka player te an khel ṭha takzet a, an hmuhnawm ka ti hle. Bellingham a khel ṭha zual a, goal nawr bakah a venhim lamah a ṭangkai a, defender te a pui hnem hle," a ti.

Kum 23 mi Bellingham hi goal khung kawngah hma a sawn hle a, World Cup khelh zawh takah khan goal sarih khungin tun season-ah Real tan goal hnih a khungna chiah a ni bawk.

Bellingham, Vinicius Junior leh Mbappe chungchanga zawhna chhangin Portuguese coach chuan, "Anni pathum hi club ka zawm aṭang khan ka duh lo anga sawi a tam hle. Mahse kei chuan team tana ṭha ber ka duh a, anni hi khawvela a ṭha berte zinga mi an ni," a ti.

Engtin zel?

Malaga lakah Marc Cucurella chiah an player thar zinga bul ṭan a ni a, Bernardo Silva leh Yan Diomande te bench aṭangin an lut bawk. Ibrahima Konate leh Denzel Dumfries te erawh an lut lo tluan a, Real squad a chhah ṭha hle.

Season hmasaah Real hian beisei an phâk lo a, nomawi chawi loin season an khar. An pu hlui Mourinho hnuaiah indinthar leh an tum a, club boruak ṭha chhoin kawng dik an zawh mek.

Real hian match thum an khelh tawhah hnehna an la chang vek a, hmahruaitu an ni mek. Mahse nizan khan an hmelma Barcelona chuan Rayo Vallecano an hmachhawn a, an result a zirin an dinhmun a danglam leh thei thung.