Inter chakna Hakan Calhanoglu

Italian champion Inter Milan chuan Inrinni zan khan an mikhualna ramah Cagliari chu 1-0 in an hneh hram a, goal awmchhun hi Hakan Calhanoglu-a khung a ni.

Kum 32 mi Calhanoglu hian minute kuana lekah, Nicolo Barella ball pek chu laklawh nei loin cool takin a khung a, Inter chak nan a tawk. Turkish midfielder hian August 22, Inrinni zan khan Monza lakah goal mawi bik a lo khung tawh a, forward te goal khung theih loh zanah an mamawh channa a ni.

Inter tan Lautaro Martinez, Manuel Akanji, Federico Dimarco, Barella leh Pio Esposito ten first half-ah an chance neih an hlah vek a, goal hmaah an hriam tawk lo hle.

Second half-ah pawh Italian rawlthar Esposito-a'n keeper chiah a hmachhawn hnuah a pet goal thei lo a, captain Martinez-a vanneih zan a nih loh bawk avangin si khat faiin an chak.

Inter coach Cristian Chivu chuan, "Kan khel chhe hran lo a, mahse goal kan khung tlem kha kan tuar ṭep. Hun tawp lamah khan tihsual kan ngah bakah Cagliari an nung thar a, mahse kan ṭan tluan theih avangin kan him hram a ni," a ti.

Inkhel dangah Napoli chu Como lakah 2-1 in an chak zo lo a, Manchester United forward hlui Rasmus Hojlund-a'n goal khung mah se Martin Baturina leh Anastasios Douvikas ten Como tan an sut a, Cesc Fabregas-a naute an chak.