Lakers-in Kuzma an ngaihven

Los Angeles Lakers chuan an squad tihchak nan an player hlui Kyle Kuzma an ngaihven a, coach JJ Redick-a'n Kuzma hi LA-a hruai kir leh a duh niin khawthlang chanchinbuten an ziak.

Kum 31 mi Kuzma hi 2017 khan Brooklyn Nets chuan draft-ah an thlang a, mahse Nets tan hian match khat mah khel hman loin hemi kum vek hian Lakers a zawm leh nghal. Lakers tan kum li khel hmanin 2020-a an champion ṭum khan, LeBron James leh Anthony Davis te kiangah khelin player pawimawh a ni.

August 2021 khan Lakers hian Russell Westbrook an duh avangin, Kuzma hi Washington Wizards-ah an kaltir a, Wizards-a a khelh ṭhat avangin Milwaukee Bucks chuan nikum February khan an la lut a, tun thlengin Bucks-ah a la khel.

American power forward hi Bucks tan a khelh hnuah defence lamah hma a sawn a, hei hi Lakers-in lak leh an duh chhan pakhat a ni. Mahse season khat a team pakhat-a player 18 awm theiah, 15 chu contract pangngai nei thei an ni a, pathum dang chu 'two way contract' nei chunga khelh an phalsak.

Lakers hian an roster-ah player 16 lai chu contract pangngai nei an ni a, Kuzma an la dawn a nih chuan an neih sa an chhuah ve a ngai dawn thung. Lakers hian Kuzma an la thei dawn a nih chuan Jarred Vanderbilt, Dalton Knecht leh Jake LaRavia te Bucks-ah kaltir an hreh lo nia sawi a awm.

Hetihlai hian Bucks hian an thiampuipa Giannis Antetokounmpo chu Miami Heat-ah an kaltir tawh a, forward-a khel thei zingah Kevin Porter Jr, Ousmane Dieng, Bogoljub Markovic, Pete Nance te bakah Giannis-a unaupate pahnih Thanasis leh Alex te an la kawl.

Mahse player tam zawk forward position nghet an ni lo a, Nance, Antetokounmpo te unau bakah Markovic te chauh hi forward-a khel ṭhang an ni. Hei bakah hian NBA-ah tawnhriat an la ngah tawk lo a, an khelh tawh dan thlirin rinrawla hman ngam an nih lo.

Bucks hian Lakers aṭangin Jarred Vanderbilt emaw, forward a khel thei an chang thei dawn lo a nih chuan Kuzma hi an chhuah phal kher a rinawm loh.