Marseille ngam loh Brunner

Pathianni zan Ligue 1 inkhelah Monaco chuan 2-0 in an mikhual Olympique Marseille chu an hneh a, Monaco goal pahnih hi Paris Brunner-a khung ve ve a ni. Marseille erawhin a chhanletna tur an nei ve lo.

Inkhel pumpuiah Marseille-in ball an chang hnem zawk a, inkhel thununtu an ni. Mahse a pawimawh ber goal an khung thei lo a, Monaco erawhin Brunner an nei a, German rawlthar hi an chakna a ni.

Kum 20 mi Brunner hi Borussia Dortmund academy chhuak niin 2024 khan Monaco hi a zawm a, 2024-25 season khan Cercle Brugge-ah lo chhuak tawhin match 18 aṭangin goal thum a khung.

Monaco tan vawi kua a inlanna chiah niin, French club tan Ligue 1-a a goal khung hmasak ber ṭum a ni bawk. Conference League playoff an khelh ṭum khan Polish club Górnik Zabrze lakah goal hnih a lo khung tawh a, tun season-a an innghahna tur a ni.

Hetihlai hian Marseille erawh an goal khung khawl pahnih–Mason Greenwood leh Pierre-Emerick Aubameyang te an hralh hnuah thlak zotu an la nei lo. Amine Gouiri leh Neal Maupay te tan hun ṭha inhawng mah se beisei an pha lo hle.