Italian GP-ah Hadjar kir a tum

Red Bull driver Isack Hadjar chuan Italian Grand Prix-ah lo kir leh theih a inbeisei a, September 2, Nilainia a hliam an endik hunah lo kir leh tura dinhmun ṭhat leh ṭhat loh a hriat dawn.

Kum 21 mi Hadjar hian thla hmasa khan a inbuatsaihnaah a banrek a tina a, Dutch GP-ah pawh a tlan tawh lo. Hadjar aiawh hian Red Bull backup driver Liam Lawson a tlan a, pasarihna a ni phâk.

French driver Hadjar-a awm loh chhungin Red Bull an che ṭha tawk lo a, Max Verstappen chu lap hnihna lekah a chetsual avangin anmahni ram leilung ngeia chak a tumna chu a thamral zui.

Hadjar chuan, "Ka career-a ka inhliam hmasak ber a ni a, inelna hmachhawn theih loh kha ka tan a harsa a, ka hnual phah hial. Mahse tunah chuan ka ban a vung lo a, dam lam ka pan mek avangin Italian GP-a tel turin beiseina ka nei sang hle," a ti.

Season hman mekah Hadjar hian point 68 hmuin drivers table-ah pariatna a ni mek a, a teammate Verstappen chu paruknaah awmin point 112 a hmu tawh bawk a, Dutch driver Verstappen hian vawi li podium a lawn tawh bawk.

Hadjar erawh a la nil thung a, Monaco GP-ah khan pathumna ni mah se second nga paihsak a ni a, a aiah a hnampui Pierre Gasly chu pathumnaah nihtir leh a ni.

Red Bull hian constructors table-ah Mercedes, Ferrari leh McLaren te an pha lo mek a, hmahruaitu Mercedes nen an inthlauhna chu point 239 lai a ni. Silver Arrows (Mercedes sawina) hi tluk phak an tum a nih chuan inelna 11 an la hmachhawn turah an chetsual a thiang tawh lo.

September 6, Pathianni zan dar 6:00 hian Italian GP neih a ni leh tawh dawn a, drivers table-a hmahruaitu Andrea Kimi Antonelli te rama intlansiak tur an nih avangin Red Bull hian hnehna chan an tum a nih chuan an theihtawp an chhuah a ngai ang.