Karius-a'n goal thum a chhuah

German club hlun Schalke chuan Pathianni zan khan, Bundesliga an kir leh hnua an match hmasa ber khelin an chak lo nghal. Schalke keeper Loris Karius-a'n goal thum a chhuah a, khualmualah an mualpho.

Augsburg tan Michael Gregoritsch-an minute 18-naah an hmahruaina goal a khung a, Schalke-in ball chang hnem zawk a, khel chhe lo mah se hmawr an bawk fuh thei lo.

Minute 62-naah midfielder Ron Schallenberg-a'n red card a hmuh hnuah, Schalke tan thawh chhuah ngaihna a awm tawh lo. Augsburg tan Anton Kade leh Rodrigo Ribeiro ten goal an khung belh a, Liverpool keeper hlui Karius-a tan tih theih a awm lo.

Schalke hian minute 75-naah Edin Dzeko luh tir mah se hun a tlem tawh a, Manchester City forward hian vawi khat pawh ball a pet hman lo a, a team a thawh chhuahpui thei lo.

Kum 2023 May khan Schalke hi an relegate a, kum hnih chhung division hniam lama an awm hnuah kum 40 mi Dzeko hoin German league sang ber khel leh turin an inpetkai.

Mahse Augsburg laka an khelh dan thlirin tla leh thei dinhmunah an dingah a ngaih theih a, chutihrualin season a inṭan chauh avangin insiamṭhatna hun an la ngah.