Ram tan Federer leh Bencic hlawhtling

Hopman Cup khelh zawh takah Switzerland aiawhtu Roger Federer leh Belinda Bencic te chuan an khingpui Germany player Angelique Kerber leh Alexander Zverev te chu 2-1 a hnehin a kum zawnin an champion.

Ram leh ram tennis team hmanga inelna huangah hian mipa singles khelh hmasak a ni a, tawnhriat ngah Federer-a'n tun hnaia hmuhnawm thei tak Zverev 6-4, 6-2 a hnehin Swiss lamin 1-0 in hma an hruai.

Hmeichhe singles-ah Kerber-i'n Bencic 6-4, 7-6 (8-6) a hneh let vein ram pahnihte dinhmun chu 1-1 chiah a ni. Mixed doubles khelh zui niin Federer leh Bencic te hian 4-0, 1-4, 4-3 (5-4) a hnehna changin an ram hi a vawi li nan nomawi an chawi sak.

Grand Slam vawi 20 champion tawh Federer leh Bencic te ṭangdun hian Hopman Cup hi vawi hnih an chawi tawh a, 2001 khan Martina Hingis nena ṭangdun chungin Federer hi a champion tawh bawk a ni.

Kum 37 mi Federer chuan, "Ka nihna ang taka ka khel chhuak thei hi ka lawm, he hmuna vawi thum champion theih hi a ropuiin ka beisei phak baka sang a ni. A pawimawh ber zawk chu kan ram Switzerland tana hlawhtlinna kan chang hi a ni," tiin a sawi.

Hopman Cup hi ram pariat inelna a ni a, January thla tir lama khelh ṭhin a nih avangin season khat chhunga Grand Slam hmasa ber Australian Open inbuatsaih nan an hmang ṭhin.