Atletico an hnual; Barca an chak

Season duhawm lo hmangtu Atletico Madrid an insiamṭha hleithei lo a, Zirtawpni zan khan La Liga inkhelah Valencia chu 2-2 in an inhnehtawkpui. Champions League khelh inchuh boruak a sang zel tihna a ni. 

Barcelona chuan Inrinni zan inkhelah Getafe chu 2-1 in an hneh a, Catalan club tan Antoine Griezmann chuan December 21 hnua a vawi khat nan La Liga-ah goal a khung ve leh ta bawk. 

Hmahruaitu Real Madrid chuan nizan dar 1:30 khan Celta Vigo an lenchilh a, result kan hre hman lo. Hnehna chang pawh ni se Barca nena an inkar hi point thum aiin a sang thei lo.

Marcos Llorente chuan Atletico tan minute 15-na lekah goal hmahruai a khung a, Valencia-in minute 40-naah Gabriel Paulista hmangin an chhanglet zui - Brazilian defender-in December 2015-a Arsenal tana goal a khung hnua a khung leh hmasak ber a ni!

Atletico-in minute thum hnua Thomas Partey-a goal hmangin hmahruai nawn mah se an vanneih zan a ni lo a, Geoffrey Kondogbia chuan Valencia tana chhanglet lehin inkhel hi 2-2 in a tawp. Alvaro Morata chuan Atletico tan chance duhawm a khung lo a, Valencia tana Jose Gaya huṭha pawh uiawm a tling. 

Champions League last 16-a Liverpool hmachhawn hmabak Atletico tan Premier League hmahruaitu mikhual tura inbuatsaihna ṭha a ni lo tih a chiang a, Diego Simeone-a naute hian inelna hrang hranga an match hnuhnung pasarihah vawi khat chiah hnehna an chang. 

Barcelona-in Real Madrid thlah fal lutuk an duh lo tih lantirin hnehna an chang a, minute 40 hmain goal hnih an khung fel der - minute 33-naah Griezmann chuan Lionel Messi-a assist duhawm chu goal-ah a chantir a, minute ruk hnu lawkah Sergi Roberto chuan Junior Firpo assist aṭangin a chhunzawm ve zui. 

Barca-in awlsam takin hnehna an chang dawn emaw tih laiin Angel Rodriguez chuan si phurh a rawn sut ṭhen a, tun season-ah substitute nichunga goal riat a khungna a ni. Kum 32 mi striker hi a vanneih zan ni se goal hnih khung thei a ni a, Marc-Andre ter Stegen-a save ṭha takin Barca a chhanhim - Getafe tana Allan Nyom-a goal hmahruai chu VAR hmanga ennawn a nih hnuah pawm a ni lo bawk. 

Kum 32 mi Angel hi Barcelona-in 'emergency signing' dan hmanga lakluh an tum zinga mi a ni a, Ousmane Dembele chu thla nga a inhliam vangin Barca hian La Liga club dang aṭangin an duh zawng player an lei thei - Angel hi pound maktaduai 7.5-in a lei chhuah theih a, an lakah a khelh dan enin Barca chil a put lehzual ang.