Asian Cup 2019: Bahrain lakah a thlengtu UAE an vannei

Asian football ngainatuten an nghahlelh Asian Cup chu Inrinni zan khan khelh ṭan a ni ta a, match hmasa berah United Arab Emirates chu hnehna chang tura beisei ni mah se Bahrain nen 1-1 in an inhnehtawk. 

Bahrain tan Mohamed Al-Romaihi-a'n minute 78-naah Asian Cup 2019-a goal hmasa ber a khung avangin UAE an tlawm dawn niin a lang hman a, mahse mahni muala tlawm duh loin Ahmed Khalil chuan hun tawp nan minute hnih chiah a awm tawh tihah penalty hmangin si phurh sutna goal a khung a, 1-1 in an ṭin. 

Nizan khan India an inlan bawk a, he thu buatsaih a nih lai hian Mizo tlangval Jeje Lalpekhlua telna team hi an result kan hre hman lo - nizanah vek hian Australia leh Jordan bakah Syria leh Palestine te an inkhel bawk. 

Zayed Sports City Stadium-a inkhelah beisei ang ngeiin UAE chu bul ṭan ṭha zawk an ni a, minute rukna lekah chance duhawm an nei nghal. Ali Mabkhout chuan Ismail Al-Hammadi tan ball ṭha tak a pe a, Ismail hian um lut ṭha viau mah se Bahrain goalkeeper Sayed Shubbar Alawi chuan a lo khawih fuh hman avangin goal-ah a chantir thei lo. 

UAE-in an chance neih ṭhat hmasak an chhawr theih loh an tuar a, Bahrain-in inrintawkna nei tawlh tawlhin UAE an ngam sawt thung. Bahrain tan Kamil Al-Aswad chuan freekick ṭha zetin a pet a, UAE an vannei chiah chiah. 

Mualneituin inelna thlengtu an nih an chhawr hlei thei lo a, Mabkhout-a'n uiawm taka a hlah hnuah Bahrain lamin an khung ta nge nge - forward Al Romaihi chuan corner aṭanga ball kal chu a tauh hnuah Khalifa Mubarak chuan line aṭangin pet chhuak hman mah se a let lehlam hi Romaihi vek hian a hlap let a, a goal chiang hle. 

Bahrain-in goal an khungin minute 78-na a ni tawh a, team pahnih khelh dan enin point thum nen an ṭin mai dawn niin a lang hman tawh - mahse UAE lamin ngaihdan dang an nei thung. 

Tlarhnung pui tura luhtir Bahrain defender Mohamed Marhoon chu khelmualah a lut chauh tihin penalty area-ah a handball nghal a, referee-in penalty spot a kawk. 

UAE tan bench aṭanga luhtir Ahmed Khalil a pen chhuak a, ram tana a match 100-na kheltu forward hian goal-a chantir turin harsatna a tawk lo, 1-1 in an ṭin. 

UAE tan goalkeeper Khalid Eisa chu player langsar bera chhal ngam a ni a, hei hian inkhel dinhmun chiang takin a hrilhfiah bawk - kum 29 mi goalkeeper hian Ali Madan shot ṭha zet a dan hnuah Al-Romaihi-a shot chhunzawmna chu a dang leh nghal zat bawk. 

Eisa hian goal an chhuah danah erawh mawhphurhna a nei tel a, corner aṭanga ball kal hnek chhuah a tumna lama a chetsual avanga goal kha lut angah a chhiar theih - minute 90 thlir erawhin a chetsualna aiin a chet ṭhatna chu langsar zawk a ni. 

Al Ain goalkeeper hi thla hmasa lawkah FIFA Club World Cup final-a Real Madrid an hmachhawn ṭumin goal li ngawt chhuah mah se a goal dan zozai hmuh hmaih a thiang lo a, final kalkawnga Team Wellington leh River Plate hneh nan a thawhhlawk takzet bawk - Asian Cup-ah hian thlir biak a nih chhunzawm pawhin a mak lo ang. 

Khawvel huap pawha ram langsar ni phak South Korea chu zanin dar 7:00 hian an match hmasa ber khel turin an inlan dawn a, Chinese Super League avanga ngaihven hlawh thar China chu tlai dar 4:30-ah an inlan bawk dawn. 

South Korea hi Tottenham Hotspur forward Son Heung-min hoa feh chhuak an ni a, Newcastle United midfielder Ki Sung-yueng leh VFL Bochum midfielder Lee Chung-yong ten an la ho theih bawk avangin an chhe lo.

South Korea hmachhawn tur Philippines erawh Chelsea youth system chhuak James Younghusband bawk a ni ang. 

Italian coach ropui Marcello Lippi enkawlna hnuaiah China an khel dawn a, champion an tum ngam ang - an hmachhawn hmasak ber tur hi Kyrgyzstan niin hnehna an chan ngei a rinawm. 

China tan hian Charlton Athletic leh Celtic tana khel tawh captain Zheng Zhi chu an hmachhuan tur a ni dawn - zanin dar 9:30-ah Iran leh Yemen an inkhel dawn bawk a, Iran pawh hi champion beisei team an ni. 

Portuguese manager lar Carlos Queiroz enkawlna hnuaia khel team hian Nottingham Forest forward Karim Ansarifard leh Brighton midfielder Alireza Jahanbakhsh te an neih avangin an chhe lo.