Liverpool player pahnihin Bournemouth pan

Premier League hmahruaitu Liverpool forward Dominic Solanke leh defender Nathaniel Clyne-te chuan Bournemouth an pan a, Solanke hian pound maktaduai 19-a a zawm laiin Clyne erawh season tawp thleng loan-a khel turin a chhuak thung. 

Kum 21 mi Solanke hian season tawp thleng loan-a khel turin Crystal Palace chu inbiakna a neihpui vek tawh a, mahse fitness chungchangah an inrem theih loh avangin Cherries hi a pan ta zawk a ni - Bournemouth manager Eddie Howe chuan a striker thar hi inhliam vangin February-ah an chhawr theih chauh tur thu a sawi.

Solanke hian kum 2017 khan Chelsea aṭangin Liverpool hi a pan a, a hun lai hian kum 21 a la tlin loh avangin zângnadawmna ang chauh Liverpool hian sum an seng. 

England tana match khat inlan tawh Solanke hian Liverpool tan tun season-ah a la khel miah lo a, tun hnaiah hliam vangin a talbuai bawk. Season hmasa khan match 21 inlanin goal khat a khung a, match 16 chu bench aṭangin a lut. 

Kum 27 mi Clyne hi hliam vanga talbuaiin season hmasa khan match ngaah chiah a inlan a, tun season-ah match nga chiah la khelin match hnihah bul a ṭan a, Trent Alexander-Arnold a nekchhuah zawh loh avangin a hmun channa tur lam a pan ta a ni. 

Bournemouth hian nizan khan FA Cup third round-ah Brighton ngam loin 1-3 in an tlawm a, Clyne hi inkhel bul ṭantir nghal a ni. Liverpool chu zanin dar 1:15-ah FA Cup-ah an inlan ve dawn bawk a, Wolves an lenchilh ang.