Arsenal tan kawng a awlsam

Inrinni zan FA Cup third round inkhelah Arsenal chuan an rawlthar rual hmangin Blackpool 3-0 in an luhchhuah a, champion hnem ber hian fourth round lut turin harsatna an tawk lo.

Gunners tan kum 19 mi Joe Willock chuan goal hnih an khung a, an goal thumna hi hun tawp dawn a Alex Iwobi khung a ni thung. Team pahnih hi season tir lam khan Carabao Cup fourth round-ah an intawng tawh a, Unai Emery naute hian 2-1 in hnehna an lo chang tawh bawk.

Bloomfield Road-a inkhelah hian mualneitu Blackpool lamin fans 3,777 an neih laiin mikhual lamin fans 5,218 an nei thung - FA Cup vawi 13 champion tawh Arsenal hian an record neih lai vawnhim an tum ang.

Arsenal manager Unai Emery chuan, "Player tin an thawkrim em em a, a bik takin kan rawthar rual an khel ṭha hle," tiin a sawi. Gunners captain Laurent Koscielny chu warm-up an neih laiin a hliam a, mahse hliam na tak a ni lo tura ngaih a ni.

Zirtawpni zan khan Tottenham chuan an mikhualna ramah League Two club Tranmere Rovers chu 7-0 ngawtin an sawp. Tun season chhunga a vawi hnih nana bul ṭantu Fernando Llorente chuan hattrick siamin, Serge Aurier-a'n goal hnih a khung bakah Son Heung-min leh Harry Kane ten goal khat ve ve an khung bawk.

Inkhel dangah Gillingham chuan tun round bika inbarakhaihna lian bera ngaih an thlentir. League One club hian Premier League club Cardiff City chu 1-0 in an hneh a, Championship club Bristol City chuan EPL mawngphaha awm Huddersfield Town chu 1-0 in an hneh ve bawk.

Everton chuan fiahna hautak an hmachhawn nghal, Ademola Lookman leh Bernard te goal hmangin League Two hmahruaitu Lincoln City chu 2-1 in an hneh hram, Toffees hian March 2016 hnua a vawi khat nan FA Cup bikah hnehna an chang a ni.