MPL13-ah pawh SAWMFELA bawk

Mizoram chhunga football inelna sang ber Star Cement Mizoram Premier League-ah Malsawmfela hming lam loin a kim thei lo. MPL13-ah pawh talent nei ṭha bik Sawmfela'n goal ropui a khung a, nimin inkhelah Mizoram Police leh MPL kai thar Ramthar Veng 3-3 in an inhnehtawk.

Durtlang Football Stadium-ah Police leh Ramthar Veng ten inkhel hmuhnawm an chhawp chhuak a, goal ruk ngawt a luh bakah Ramthar Veng captain Joshua Vanlalrinliana Ngente hnawhchhuah a ni bawk.

Sawmfela Show

Ramthar Vengin goal an khung hmasa a, minute sarihna lekah captain Jojo-a'n a tauh lut. Police-in corner kick aṭanga ball kal hmun himah an pet chhuak thei lo a, MS Dawngliana'n fing taka dinglama a pek hnuah PC Lalruatsanga'n ṭha taka cross lutin Jojo-a'n a tauh lut.

Police-in hliam vangin F. Lallawmkima an chhawr thei lo a, hmabak a ko hle. Mahse, Malsawmfela'n a thiam thil a la theihnghilh lo a, minute 20-naah vei lam aṭanga Republic Vengthlang tlangval B. Rosangliana cross chu Ramhlun South striker Sawmfela'n a chest hnuin a back volley goal.

Ramthar Veng keeper Joel B. Lalramchhana tan dan ngaihna a awm lo a, captain Jojo pawhin dan ngaihna a hre lo. Kg 90 chuanga rit Sawmfela a invawrh sang a, MPL history ang pawha goal ropui ni phak tur goal a khung. Minute 27-naah ball pet thiam R. Malsawmtluanga corner pet chu Sawmfela'n a lu hmangin goal kilah a dah a, Police-in 2-1 in hma an hruai. Second half ṭantirhah Lalbiakhlua a rawn lut a, Keifang keite hian minute 52-naah a khung nghal - Ramthar Veng tlarhnung a pherh!

Comeback chu

Goal thum luh hnuah Ramthar Veng an zuai a, Police dinhmun ṭha hman viau mah se substitution an siam fuh tawk lo. Ramthar Veng lamin tawnhriat nei ṭha MS Dawngliana an kawl a, Dawngtea hnathawh ṭhat zarah minute 75-naah PC-a'n siphurh a sut.

Ramthar Veng an phur thar a, minute 78-naah freekick hmang ṭangkaiin K. Lalfakzuala'n a tauh lut. MPL kai thar lam hian ṭantu an neih ṭhat bawk avangin chak thei tur dinhmunah an ding a, an goal bawh a na zui bawk. Mahse, ṭul lo takin JoJo-a'n minute 84-naah yellow card vawi hnihna hmuin hnawhchhuah a ni.

Police dinhmun a ṭha ta zawk a, hun tawp lamah captain Biaktea'n ṭum hnih goal khung theihna remchang nei mah se an hmang ṭangkai thei lo. Inkhel hmuhnawm bik hi 3-3 in a tawp a, Sawmfela goal ropuiin sawi zui a hlawh.