Zverev-a'n Sonego hneh hram

US Open-ah seeded no. 1 Alexander Zverev chuan first round-ah Lorenzo Sonego chu 6-4 3-6 6-7 (7-9) 7-5 6-4 in an hneh hram. Arthur Ashe Stadium-ah set nga khelh a ni a, inkhelh zawh meuh chuan inkhelhna hmun New York-ah zing lam dar 2:00 a ni tawh.

Zverev hian French Open a champion hnuah Wimbledon-ah a champion a, US Open-ah pawh world no. 1 Jannik Sinner a tel loh avangin seeded no. 1 a ni hial. Mahse, Italian tlangval Sonego lakah German tennis star hi a talbuai hle.

Chak tura rinkai zawk Zverev-a'n set hmasa ber 6-4 in a la a, harsatna nei loa chak mai tura ngaih a ni. Mahse, rin ang ngawtin thil a thleng lo. Kum 31 Sonego-a'n 6-3 a set hnihna a lak hnuah set thumna pawh 7-6 in a la zui a, inkhel boruak a ṭang ṭha hle.

Set linaah Zverev hian a tawpah break sak hramin 7-5 in a la a, set tawp berah 6-4 in a la leh bawk. Seeded no. 1 Zverev chuan, "Ka chak avangin ka lawm. Kan inkhel tawk a, chet ṭhat lai leh chet chhiat lai a awm. Ka dam chunga first round ka khelh rei ber ṭum niin ka hria. A khel ṭha takzet a, player ṭhahnem tak a hneh thei ang," tiin a khingpui a fak.

Zverev hi seeded no. 1 a ni ringawt lo a, a elpui ber tur seeded no. 2 Carlos Alcaraz-a'n match fitness a nei ṭha tawk lo. First round-ah seeded no. 4 Novak Djokovic a tla zui a, tun hi Zverev tan US Open champion-na hun ṭha a ni.

Zanin dar 8:30 bawr vel hian Zverev hian French player Quentin Halys a hmachhawn ang. Seeded no. 1 kalkawnga seeded player inlan thei hmasa ber chu Alejandro Tabilo a ni a, Chilean player hi seeded 25 niin second round-ah Alexei Popyrin a hneh a, Zverev-a'n hnehna a chan bawk chuan third round-ah an inhmachhawn thei ang.