Kum 40 tlin lawm nan Monfils a chak

Gael Monfils chuan US Open-ah kum 40 tlin lawm nan Paraguayan player Adolfo Daniel Vallejo chu 2-6, 6-1, 6-2, 6-0 in a hneh. French tennis star Monfils hi Jimmy Connors hnua main draw-a hnehna chang thei upa ber a ni.

Connors hian kum 1992 khan kum 40 pianchamah hnehna a chang a, Monfils pawh hian kum 40 pian chamah tho Vallejo hi a hneh. A khelh dan nung ṭha tak avanga tennis ṭantu ṭhahnem takin an ngaihsan Monfils hi a thlen san lai berin world no. 6 a ni a, kum 2016 khan US Open-ah semifinal a thleng.

Monfils chuan, "Kum 40 pianchama ka khel hi ka lawm a, ka tan a hlu hle. New York boruak a nung ṭha a, helai hmun hi nuam ka ti," tiin inkhel entute a fak. Tun season zawhah Monfils hi a chawl tawh dawn a, US Open hi Grand Slam a khelh hnuhnun ber a ni.

Zanin dar 8:30 hian Monfils hian American Learner Tien a hmachhawn dawn a, Tien hi seeded 14 a nih phak avangin kum 40 mi Monfils tan hna a hautak dawn.