5 star Aizawl FC

Star Cement MPL13-ah Aizawl FC-in match thum an khel tawh a, match tinah goal nga an la khung vek. R. Lalruatfela hote hian nimin khan Kanan FC an hmachhawn a, 5-0 in an sawp. AFC tan Zomuansanga'n first half-ah goal hmahruai a khung hnuin second half-ah Laltlanzova'n goal hnih a khung a, T. Malsawmzuala leh Lalhruaitluanga ten goal khat ve ve an khung leh bawk.

Durtlang Football Stadium-a inkhelah Aizawl FC-in game mawi an khel a, tlarhnung aṭangin ball an in pass kual a, Kanan FC lakah an chungnung nghal hle. I Day Football final rematch-ah hian Kananin inkhelh ṭantirh lamah khelh dan nghet an nei a, goal chhuah lo turin tlarhnung an veng ṭha.

Kanan hian inkhel tir lamah Aizawl FC dang thei mah se minute 22-naah hmun hlauhawm laiah an chesual a, tun dinhmuna MPL player hriam ber Zomuana'n ball changin awlsam hmel takin goal hmahruai a khung. Second half-ah Kanan an ṭang thei tawh lo a, a khat mawi tawkin Aizawl FC-in goal an khung a, Zozoa'n a theihna sang tak a pho chhuak bawk.