Pro Fight : Boxer 336-in hming thehlut

Mizoram Labour Link LPS Pro Fight ṭan ni nga chiah a awm tawh a, August 31, Thawhṭanni khan hming pekluh hun a tawp. Boxer 336-in tel tumin lehkha an thehlut a, champion tawh mi pali an tel a ni.

Hming pe lut 336 zingah flyweight-ah an tam ber a, mi 94-in Lalrinngheta title kawl lai chhuhsak an tum dawn, bantam-ah boxer 74, light-ah 71, welter-ah 60 leh middle-ah champion lai F. Lalthanliana Junior nen mi 26-in hming an pe lut.

Kumin inelnaah hian Mizoram chhung hmun hrang hrang bakah state pawn aṭanga tel an awm a, Mizoram chhung aṭanga hnam dang tel tum pawh an awm. Hming pe lutte hian September 4, Zirtawpni zing dar 8:00 hian LPS Arena, Falkland-ah medical test bakah an inbuk dawn a, heta tlingte hian inelna an hmachhawn thei ang.

Inbuk hi inelna buatsaihtute lamin chawhma dar 11:00-ah zawh fel tum a ni a, tumah nghah an nih dawn loh avangin boxer te tan inbuk hun ngaih pawimawh a fuh ang.

Pro Fight hnuhnung ber kum 2024-a neihah khan champion laite nen boxer 286 an tel a, tun ṭuma lehkha theh lut hi kum hnih kal taa inhnek aiin 50-in an tam. Weight tinah tam zawk vek bawk a, mahse an inbuk zawh hnuah tel tur dik tak a hriat theih dawn chauh thung.

Weight hrang pangaa champion lai zingah bantam title kawltu Laldinsanga bakah, light title kawl mektu Lalkhawngaiha te an tel dawn lo a, welter champion lai Lallawmawma'n title kalsanin lightweight-ah a insawn dawn bawk.

Middle-a champion tawh C. Lalhruaitluanga leh welter-a champion Lalruatzela Hauzel chuan, F. Lalthanliana Junior kuta awm mek middleweight champion kawnghren chhuhsak an tum dawn a, bantam leh light-a champion tawh HC Lalramfela'n Lawmawma kalsan welter champion kawnghren lak a tum bawk ang.

Chawngtlai boxer Hruaia'n 2022 khan welterweight title hnek chhuakin 2023-ah middle-ah a insawn a, title fight-ah Thanliana hnehin weight hrang pahnihah a champion. Mahse, championship hnuhnung ber 2024 khan title humhim zo loin Thanliana lakah a tlawm ve thung.

Mission Veng tlangval Ruatzela'n 2023 khan Hruaia kalsan welterweight champion kawnghren rochunin, a kum lehah a humhim zo lo a, Tuipui boxer Lawmawma lakah a tlawm. Chawngtlai boxer Ramfela'n 2015 khan bantam title lain 2023-ah light-ah a champion leh a, 2024 khan welter-ah insawnin weight hrang pathuma champion a tumna a puitlin zo lo.

Pro Fight vawi 12-naah hian a tir aṭanga round of 16 thlengin round thum an khel dawn a, quarterfinal aṭanga title fight thlengin round li an khel thung ang. Quarterfinal lutte an inbuk ṭha leh vek ang a, title fight-a inlan turte an inbuk ṭha leh dawn bawk a ni.

September 8, Thawhlehni zanah inhnek tak tak hi ṭan a ni dawn a, October 16, 2026-ah title fight hmangin championship hmawr bawk a ni ang.