Watkins-a'n goal a khung nghal

Aston Villa aṭanga Al Hilal pantu Ollie Watkins chuan Saudi Pro League-a a match hmasa berah goal a khung nghal a, kum 29 mi forward hian Thawhlehni zana Al Ahli 3-0 a an hneh ṭumin an goal thumna a khung.

English forward hian inkhel bul a ṭan lo thung a, Sergej Milinkovic Savic-a'n hmahruaina goal a khung a, West Ham United forward hlui Crysencio Summerville-a'n an goal hnihna a khung bawk.

Watkins hi second half-ah lutin minute 86-naah an chak nemnghehna goal a khung a, a club thar tan a inlan hmasak berah goal a khung nghal avangin a inringtawk sawt ang.

England international chuan, "He hmuna ka awm thei hi ka lawm a, ṭha taka bul ka ṭan bawk avangin ka lawm lehzual. He stadium-ah hian thil ropui tak thlentir ka tum dawn. Ka rin phâk bakin Saudi quality a sang a, Premier League nen a danglam tam lo hle," a ti.

Veteran striker Karim Benzema-a'n August 31 khan Al Hilal hi a chhuahsan a, a thlakna turin Watkins hi an duh. Saudi club hi Villa nen inrem thei lawk lo mah se an beidawng duh lo a, Watkins an hawisan loh ran an hmuah a ngaih theih.

Al Hilal hian player langsar an ngah a, Al Ahli lakah Savic, Summerville, Yassine Bounou, Kalidou Koulibaly, Theo Hernandez leh Ruben Neves ten bul an ṭan thei a, league nomawi kawl mektu Al Nassr chhuhsak an tum dawn.

Season kal mekah Al Hilal hi league-ah hmahruaitu an ni mek a, Cristiano Ronaldo khelhna Al Nassr nen match li an khelh tawhah la chak vek awmchhun an ni. Mahse Al Hilal hi goal difference-ah an ṭhat zawk avangin Ronaldo leh a ṭhianten an tluk lo.