Jazz-in Wolves-ah Williams kaltir
Utah Jazz chuan an player Cody Williams chu Minnesota Timberwolves-ah an kaltir a, Jazz hian Josh Green an lak theih nan Williams bakah John Konchar an chhuahtir bawk.
Kum 21 mi Williams hi 2024 NBA draft-ah khan Jazz hian an club-a khel turin an thlang a, mahse a season hmasa berah hian G League-a Jazz club pakhat zawk Salt Lake City Stars tan hun tam zawk a hmang.
Season hmasa khan Jazz tan inlan ṭanin season pumpuiah match 67 a khel a, vawi 41 zet bul a ṭan. Williams hian match rukah point 20 score tlin a nei a, kumin March 25 khan a career-a a point score san ber ṭum tawngin, Sacramento Kings lakah point 34 a nei tling.
American point guard hi Oklahoma City Thunder player Jalen Williams-a nau a ni a, a kum a la naupan bakah theihna sang tak a neih bawk avangin Wolves hian an player pahnih chan huamin an la lut. Williams tan Wolves hi a NBA-a a club pahnihna tur chiah a ni.
Ani bakah hian Konchar sawi hmaih a thiang lo a, kum 30 mi shooting guard hian kumin February khan Memphis Grizzlies aṭangin Jazz a zawm a, season laklawh laia zawm a nih avangin match 26 chiah a khelhsak hman.
Mahse Grizzlies tan kum sarih a khelh chhungin match 337 zet a khelhsak hman a, NBA-ah tawnhriat a ngah tawh avangin Wolves-in an tan a ṭangkai thei dawn
Wolves hian Williams leh Konchar hma hian Lamelo Ball leh Jonathan Kuminga te an lo la lut tawh a, player langsar sa an lak luh bakah Anthony Edwards, Rudy Gobert leh Donte DiVincenzo te an neih bawk avangin champion an tum ngam ang.
Jazz aṭanga pantu Green erawh 2020 khan Dallas Mavericks-in draft-a an thlan hnuah Mavs-ah hian kum li a khel hman a, Australian shooting guard hian 2024 khan Charlotte Hornets a zawm a, kum hnih a awm hnuah kumin June khan Wolves a zawm a, thla hnih hnu lawkah chhuak leh nghalin Jazz tan a khel dawn.
Jazz hian player thar an ngah dawn a, kum 25 mi Green hma hian Matt Murrell, Mo Bamba, Jaxson Hayes leh Josh Okogie te an lo la lut tawh a, Trey Alexander leh Tamar Bates te two way contract an ziahpui bakah Jusuf Nurkic chu contract thar an ziahpui bawk avangin an chhe dawn lo.