Dinhmun chiang lo Paredes

Argentina midfielder Leandro Paredes chuan FIFA-in match 10 chhung ram tana khel thei loa a hrem hnuah, an ram tana inkhelh chhunzawm leh chu a harsat tawh tur thu a sawi a, Lionel Messi-a'n ram tan inkhelh a chawlhsan chuan nghawng a nei bawk tih a sawi

Kum 32 mi Paredes hian kumin World Cup final-a Spain 1-0 an hneh loh ṭum khan, Spanish defender Eric Garcia chu rekin Gavi chu leiah a paih thlu bawk avangin hrem a ni.

Paris St-Germain midfielder hlui chuan, "Ka tan national team-a khelh zui zel hi a harsat ka ring. Hremna ka tawr vang bakagh Messi thuthlukna vang pawh a ni tel bawk. Midang tan pawh hma anga ṭhaa khelh chhuah leh a harsa tawh mai thei.

He thil chungchang hi coach Lionel Scaloni nen kan la sawi dun lo a, mahse kan la la inbe vat dawn. Ani nen kan titi hunah eng ang thutlukna nge ka siam dawn kan hria ang chu," a ti.

AS Roma tan pawha khel tawh Paredes hi kumin bakah 2022-a Argentina-in World Cup an champion ṭum khan player pawimawh a ni a, La Albiceleste (Argentina sawina) tan theihtawp a chhuah ṭhin avangin an ram mipuite ngainat a hlawh hle.

Hetihlai hian kum 39 mi Messi-a'n inkhelh a chawlhsan thu a puang a, ram tan a theihna zawng zawng a hlan tawh bakah pek leh chuan tur a neih tawh loh thu a sawi. Ram tan match 207-a goal 125 khungtu hi tuman an thlak zo kher lo ang.

Paredes chuan sawi chhunzawmin "Messi sulhnute hi kumkhuaa hriat reng tawh tur a ni a, a thil tih takte avang leh beidawng ngai loa a beihnate chuan rah ṭha a chhuah a, a thil tumte a tihlawhtling vek tawhah a ngaih theih.

World Cup final-ah khan final hi a match hnuhnung ber a nih tur thu min hrilh tawh a, mahse kan tan a hlut em avangin min hriattir lawk chung pawhin a tel loa kal zel kan la inpeih lo hle," a ti.