JK Tyre leh Atiqa thawkho dawn

India rama motor ke siamtu lar JK Tyre chuan, motorsport-a hmeichhe naupang beiseiawm kum 11 mi Atiqa Mir chu inremna neihpuiin contract an ziak. Hei hian ram chhunga motorsport champion thar tur zawn chhuah leh, lirthei hmanga inelna tihhmasawn zelna tura hma an lakna pawimawh a nih theih an beisei.

A phur thu sawiin Atiqa chuan, "JK Tyre nena thawhho hi ka tan chuan a ropui takzet, an thil tihte leh racer naupang zawkte tana kawng an hawng ṭhin hi ka ngaihluin ka ngaisang hle.

He infiamnaah hian ka phur zual zel a, hmasawn zela international stage-ah India leh JK Tyre ai ka awh theih ka inring a ni," a ti. Atiqa-i pa Asif Nazir Mir pawh racer tho a ni a, kum 2000 khan India-a National Karting Championship hmasa berah lo champion tawhin JK Tyre nen hian an lo thawkho tawh ṭhin.

JK Tyre & Industries managing director Anshuman Singhania chuan, "JK Tyre-ah chuan naupang talent hai chhuah hi kan thupui a ni reng thin. Atiqa hi racer ṭha tak a ni a, khawvel huapa a hlawhtlin zelna tura kan pui thei hi kan hlim hle a ni," a ti.

Atiqa hi la naupang hle mah se India rama motorsport huangah chuan beiseiawm ber zinga mi a ni tawh a, International karting circuit-ah pawh a thiamzia a lo lantir tawh.

Europe leh Middle East-a championship lian tak takah a lo tel tawh a, International Karting Ranking (IKR)-a OK National Junior (OKNJ)-in a tarlan danin khawvel huapa hmeichhia karting thiam ber, world no. 1 a ni mek bawk.

Kumina Spain, Greece leh Italy-a Champions of the Future Academy European leg-ah khan Indian zinga podium lawn hmasa ber a lo ni tawh. Greece-ah hian hnehna chang zuiin qualifying, heats leh final-ah te pakhatna a hauh vek a, hetiang ti thei hi driver pathum chiah an la awm. FIA European Karting Championship-ah Indian zinga top 10 lang thei naupang ber a ni.

Jammu & Kashmir tleirawl hi Indian mai ni lo, Asian hmeichhe racer zinga F1 Academy-in 'Discover Your Drive' atanan thlan hmasak ber a ni a, hei hian he infiamnaa beiseiawm ber a nihna a tilang chiang lehzual.