McTominay an zai dawn

Napoli chuan an midfielder Scott McTominay chu lungphu a pangngai lo deuh (mild benign arrhythmia) tih an hmuhchhuak a, an zai dawn tih an puangin a lo kir leh hun tur a chiang lo thung.

Kum 29 mi McTominay hian tun season match hnih an khelh tawhah bul a la ṭan ve ve a, August 30, Pathianni zana Como an hneh loh ṭum khan minute 56-naah an la chhuak a, harsatna a nei lo.

Manchester United midfielder hlui a lo let leh hun tur sawi chian theih ni lo mah se, October thla tira international break zawh velah a inkhelh leh theih an beisei thu Napoli chuan an sawi. McTominay pawhin Instagram-ah,"Kan inhmu leh vat dawn nia, a rei lo ang," tiin a post.

Scottish midfielder hi a chawlh rih a ngaih dawn avangin an ram coach thar, Sebastien Pocognoli hnuaia an match hmasa pali a khel thei dawn lo tura ngaih a ni a, an khelh tur hi Nations League group stage a nih dawn avangin Scotland tan channa nasa tak a tling.

McTominay hian kum nga mi chauh a nih laiin Man United academy a zawm a, 2017 khan senior team tan inlan ṭanin 2024-a Napoli a zawm hma thleng khan vawi 255 a inlan hman a, FA Cup leh League Cup vawi khat ve ve a chawipui.

Serie A-a a insawn hnuah hmasawn lehzualin 2024-25 season-ah Napoli chu champion pui nghalin, Serie A-a player ṭha ber 'Most Valuable Player' (MVP) a dawng bawk.