Minute 53 lekah Sabalenka a chak

US Open hnuhnung pahniha champion Aryna Sabalenka chuan nimin zing khan vawi khat telna Polina Iatcenko chu minute 53 lekah a hneh. World number 1 hian 6-1, 6-1 in qualifier aṭanga invaw tling Polina hi a hneh.

Belarusian nula Sabalenka hi chiang takin chak mah se inkhelh bana a zawhna dawnah a lawm lo a, journalist nen an inchhang. Journalist hian inelna ṭan hmaa party-naa a kal nasa thu a sawi chhuak a, Sabalenka chuan, "Eng zawhna nge ni ngai? ka training lai ni lo thil dang ka pholang ang maw?" tiin a lungawi lo takin a chhanglet.

World no. 1 Sabalenka chuan sawi chhuznawmin, "Ni e, inelna ṭan hma chuan rilru ka pe tawk lo pawh a ni ang. Tunah chuan, inelna kan ṭan tawh, zawhna dang zawt ru," tiin a sawi.

Sabalenka hi kuminah a chet ṭhat tawk loh avangin world no. 1 dinhmun a him lo. Belarussian nula hian point 8575 a hmu mek a, a hnuaia awm Elena Rybakina (8141), Jessica Pegula (7265) leh Coco Gauff (67-4) ten an hlat lo. Seeded number 2 Rybakina hian khawtual nula Thea Frodin chu 6-3, 6-2 a hnehin second round a lut a; Tukin zing hian Jessica Bouzas Maneiro nen an inhmachhawn ang.

Tun dinhmunah world no. 1 Sabalenka bakah seeded no. 6 Linda Nosková, seeded no. 7 Karolína Muchová, seeded no. 9 Elina Svitolina leh seeded no. 11 Marta Kostyuk ten third round an lut tawh.