Mizoramin goal sarih an khung

Junior Boys’ National Football Championship for Dr. B.C. Roy Trophy 2026-27-ah Mizoramin nimin zing khan Tamil Nadu 7-0 in an sawp. Coach Lalrindika Khiangte kaihhruai Mizoram hian group match hnuhnung berah Meghalaya an hmachhawn dawn a, point an hmu hrim hrim a nih chuan semifinal an lut ang.

Bengaluru Football Stadium-a inkhelah Mizoramin inkhel thunun nghal mah se lawm a kim lo. Zemabawk North rawlthar Jacob Malsawmsanga hliam vangin minute 11-na lekah lakchhuah a ni.

Tamil Nadu-in Mizoram an khan lo a, a khat mawi tawkin goal an khung. Mizoram tan Ruallung rawlthar Victor VLMS Dawngzela'n hattrick a siam a; Victor Lalawmpuia, Lalnunfela, C. Lalhmingropuia leh Lalnunhlua ten goal khat ṭheuh an khung.

Group match hnuhnung bera Mizoram khingpui tur Meghalaya-in Maharashtra 3-0 in an hneh ve thung. Mizoram hian goal difference pakua an neih laiin Maharashtra hian GD 4 chiah an nei a, hei vang hian coach Dika hote hian an draw a nih pawhin semifinal an lut ang.

Mizoram hian semifinal-ah Keralam, Telangana, Manipur leh Assam te awmna group aṭanga pakhatna an hmachhawn dawn a; Manipur chu an group-a pakhatna ni turin an dinhmun an ṭha ber. Semifinal hi September 7, Thawhṭanniah khelh tur a ni a, final hi September 9, Nilainiah khelh a ni ang. West Bengal-in final an lut tawh a ni.