Barca pan turin ka hlawh ka tihniam - Jesus

Arsenal aṭanga Barcelona pantu Gabriel Jesus chuan, Catalan club zawm turin a hlawh a tihhniam thu a sawi a, Brazilian striker chuan, "He hmuna lo kal tur hian nasa takin ka hlawh ka tihniam a ni," a ti.

Barcelona hian Atletico Madrid striker Julian Alvarez beisei mah se, an la thei lo a, a tawpah chuan Arsenal-a hmun chang tawh lo Jesus an la lut. Barca hian Jesus lakluh nan hian pound maktaduai 12.85 an seng a, sell-on fee an ziak tel bawk.

Jesus chuan, "Barca ka zawm theih nan keimah chauhin hma ka la lo a, Barca pawhin theihtawp an chhuah. Thla khat liam taah khan he thil hi a thleng thei ang em, tiin min zawt ta ula, kum 29-ah chuan Barca-a rawn kalna chance hi ka neih ka ring lo," a ti!

Brazil tan vawi 64 inlana goal 19 khungtu Jesus hian an ram club Palmeiras aṭangin a hming a chher a, khatihlai khan Barca panna chance a lo nei tawh. Mahse, kum 2017-ah Manchester City pan a thlang a, Champions League nomawi chawi lo mah se, Premier League-ah nomawi pali a chawipui hman.

Jesus chuan, "Kum 10 liam taah khan Barca zawmna chance ka lo nei tawh a, hringnun chuan hun duhawm zawk a rawn herchhuahpui leh ta a nih hi," a ti - kum 2022 khan City hi chhuahsanin Arsenal a zawm a, mahse, kum 2025-a a khup a hliam hnuah Gunners tan hmun a chang phak ta meuh lo.

Barca striker thar chuan, "Ka khup hliam avangin tun hnai kum hnih kha chu hrehawm ka ti hle. Kum khat deuhthaw inkhel loin ka awm a, tunah erawh ka inpeih leh ta e. Ka dam ṭha a, Arsenal tan pawh ka inlan leh tawh a, 100% in ka inpeih," a ti.

Jesus hian City tan match 236 khelin goal 95 a khung a, assist vawi 45 a nei. Arsenal tan match 123 khelin, goal 32 a khung a, assist vawi 22 a nei bawk. Jesus hian Arsenal-ah khan kar khatah £265,000 – £300,000 inkar a hlawh nia sawi a ni a, Barca-ah hian £214,200 a hlawh dawn.

Barca player hlawh hnem pawl a la ni dawn tho a, midfielder Frenkie de Jong (£213,850), Pedri (£205,309), Dani Olmo (£205,309) leh Anthony Gordon (£197,097) te aiin a la hlawh hnem dawn a ni.