Buaina kara leng PSG hmaah Monaco

Season thara Ligue 1 match thumna lekah French champion Paris St-Germain chuan fiahna hautak an hmachhawn nghal dawn a, zanin dar 12:15AM hian AS Monaco nen an inhmachhawn dawn.

Monaco hi an khelh tawhah la chak ve vein hmahruaitu an ni a, goal thum khungin an lamah a la lut ve lo. PSG erawh goal li khung tawh mah se an khung zat bawk an chhuah a, point hnih hmu tawhin chak an la nei lo. Insiamṭhat an mamawh lai taka Monaco hmachhawn an chak bik dawn lo a, inkhel hmuhnawm a beisei ngam.

PSG hi

Luis Enrique-a nauten an match hmasa bera Rennes lakah goal hnih an chhuah hnuin, an player thar Ferran Torres-a'n a club thar tan goal hnih khungin an siphurh a sut a, an him hram.

An match hnihnaah pawh beisei an pha lo a, Lille lakah si hnih an phur reng hnuah injury time-ah an siphurh an sut zo hram. Inkhelh bana a lawm zawk an nihna chuan an khelh ṭhat lohzia a hrilhfiah

Kum 56 mi Enrique chuan season tharah hnehna la chang loin point hnih chauh la hlawh chhuak mah se, season hmasaa Rennes leh Lille laka an point hmuh aiin an hmuh hnem tawh avangin hma an sawn tih a sawi.

Spanish coach hian a naute chhan mah se an khelh danah season hmasa an pha lo takzet a, league champion lai leh Champions League nomawi a zawna chawitu an ni tih a hriat loh. PSG hi Monaco lakah an chak zo lo leh a nih chuan fans an lungawi reng tawh bik lo ang.

Hello Filipe

Beisei phak baka che ṭha Monaco erawh an boruak ṭhat lai tak a ni a, an boruak vawrh kângtu chu an manager Filipe Luis a tih loh theih loh. Atletico Madrid defender hlui hian 2023-a inkhelh a chawlhsan hnuah club enkawl lam a luhchilh a, manager ṭha tia sawi nan la hma mah se a duai lo hle.

Kum 41 mi Filipe Luis hian inkhelh a chawlhsanna an ram club Flamengo youth team enkawlin bul a ṭan a, kum khat hnu lawkah senior team enkawl turin an ruai nghal. Brazilian club hi kum hnih lek a enkawl chhungin nomawi panga a chawipui hman.

Brazilian manager hian kumin June khan 'Les Rouge et Blanc' (Monaco sawina) hi a zawm ve chauh a, Flamengo-ah a record ṭha mah se tawnhriat a la ngah tawk loh avangin rinhlehna nen thlir a ni. Mahse amah ringhleltu leh sawiseltute chu result hmangin an ka a hupsak nghal.

Nipui transfer-ah pawh sum tam tak a seng lo a, a player lak zinga man to ber Matthis Abline pawh euro maktaduai 25 man chauh a ni. Monaco hi an player ṭhaten an chhuahsan nasat avangin tun hnaiah an reh a, mahse Luis hoin thawm an nei thar. PSG an hneh a nih ngat chuan Monaco fans-in an ngaina lehual ang

Inlan tur

PSG left back Nuno Mendes chu a malpui a tihnat avangin a inlan theih a rinawm loh a, Portuguese defender hi August 16 zana Trophée des Champions-a Lens an hneh loh hnuah squad-ah a awm leh tawh lo.

Kum 24 mi Mendes awm dawn lo mah se Lucas Hernandez, Lucas Beraldo leh Aston Villa aṭanga an lak Lucas Digne te an neih avangin lungngaihna tur a awm lo. Mendes tih loh chu hliam vanga inlan thei lo tur an awm lo.

An thiampuipa Ousmane Dembele erawh a lo kir leh thei tawh dawn a, French forward hi an match hnuhnung berah a inlan tawh lo a, goal nena lo kir ngei a tum ang.

Hei bakah hian Rennes laka goal khungtu Vitinha leh Marquinhos te chu an innghahna an ni leh dawn a, chak an duh a nih chuan Torres bakah Khvicha Kvaratskhelia, Mika Godts leh Desire Doue ten an theihna tak tak an lan chhuahtir a hun tawh.

Monaco lamah Takumi Minamino leh Mohammed Salisu te chu hliam vanga inlan thei lo tur an ni a, Ansu Fati pawh a chawnah hliam a neih avangina dinhmuna chiang lo.

An innghahna tur Paris Brunner erawh a dam ṭha a,kum 20 mi forward hian kar hmasa khan Marseille lakah goal hnih a khung bakah Conference League-ah pawh goal hnih bawk a khung tawh a, PSG lakah pawh an hmachhuan ber a ni dawn.