Hadjar la chawl rih dawn

Red Bull driver Isack Hadjar chu a hliam a la dam chian loh avangin, Pathianni zana neih tur Italian Grand Prix-ah a la inlan thei dawn lo a, a chawlh chhung hian Dutch GP-a a aiawhtu Liam Lawson a tlan leh dawn.

Kum 21 mi Hadjar hian thla hmasa khan a inbuatsaihnaah a banrek a tina a, Dutch GP-ah pawh a tlan tawh lo. A aiawha tlan Red Bull backup driver Lawson chu pasarihna a ni.

Nilaini khan Hadjar hian a hliamin dam lam a pan tih sawiin, Autodromo Nazionale Monza-ah intlansiak leh hman a inbeisei hle. Mahse dam chiang lo chunga tlan ai chuan chawlh hahdam rih a thlang.

New Zealand driver Lawson tan hun ṭha a inherchhuak leh turah a ngaih theih a, kum 24 mi driver hian Dutch GP aia sang thlen a tum tawh ang. Hetihlai hian Racing Bulls-a Lawson-a hmun ruak chu, reserve driver Yuki Tsunoda chuan a luah leh dawn thung.

Season hman mekah Hadjar hian point 68 hmuin drivers table-ah pariatna a ni mek a, a teammate Verstappen chu paruknaah awmin point 112 a hmu tawh bawk a, Dutch driver Verstappen hian vawi li podium a lawn tawh bawk.

Hadjar erawh a la nil thung a, Monaco GP-ah khan pathumna ni mah se second nga paihsak a ni a, a aiah a hnampui Pierre Gasly chu pathumnaah nihtir leh a ni.

Red Bull hian constructors table-ah Mercedes, Ferrari leh McLaren te an pha lo mek a, hmahruaitu Mercedes nen an inthlauhna chu point 239 lai a ni. Silver Arrows (Mercedes sawina) hi tluk phâk an tum a nih chuan inelna 11 an la hmachhawn turah an chetsual a thiang tawh lo.

September 6, Pathianni zan dar 6:00 hian Italian GP neih a ni leh tawh dawn a, drivers table-a hmahruaitu Andrea Kimi Antonelli te rama intlansiak tur an nih avangin Red Bull hian hnehna chan an tum a nih chuan an theihtawp an chhuah a ngai ang.