Mbappe ruk bo an tum

Mi rukbo tumna thil chhui mekah mi hausa leh milar chenna hmun leh mimal chanchin inziahna hmuhchhuah a ni a, an zingah Kylian Mbappe pawh a tel niin khawthlang chanchinbuten an ziak.

Real Madrid forward hming hi tanina tang mek kum 18 mi, thuneituten an kawl hnu pawha suamhmang pawl kaihruai chhunzawm zela puh hnen aṭanga mobile phone aṭangin an hmuchhuak a, Mbappe bakah hian rapper pakhat a hming tarlan loh, Chinese sumdawng hausa leh Turkish sumdawng te pawh an tel.

French chanchinbu Le Parisien tarlan danin, hnuchhuitute chuan an mi man Clément L, nia insawi hnen aṭanga mobile phone pahnih an manah mi hausa leh mi larte chanchin inziahna chhinchhiahna an hmu chhuak a, he list-ah hian mi 26 zet an awm.

He thil hi inrukbo tumna lam nia ngaih a ni a, he pawl hian hma an lak thui tawh dan te, an bitum zinga mi rukbo emaw suam tuma hmalakna a awm em tih ngaihvenin an a chhuitute chuan an enthla reng.

Clément L hi nawhchizawrhna leh rukruk tumna lama puh a nih avanga hren mek a ni a, tan ina an kawl mek lai pawhin pawi khawih tumin a che reng tih an hmu chhuak

He tlangval hi Snapchat-ah 'Lester Z' tih hming hmangin a che a, April thla khan France rama veng pakhat Neuilly sur Seine-a thil hlu zawrhna leh sana dawr lian rawktu pahnih zinga pakhat a ni tih an lo chhui chhuak tawh.

Hetihlai hian Mbappe chu a ngaihtuahawm lo niin Spanish chanchinbute chuan an sawi a, zanin dar 12:30-a Los Blancos-in Real Betis an tlawh hunah pawh a inlan a rinawm. Mbappe hian tun season-ah match thum khelin goal li a khung tling leh der tawh a, top scorer tura rinkai ber a ni leh tawh.