Atletico ka hrethiam lo - Olmo

Barcelona forward Dani Olmo chuan, Barca zawm duh, Atletico Madrid striker Julian Alvarez chhuah phal lotu Madrid club a hriatthiam loh thu a sawi - Alvarez hian Barca pan a duh a, mahse, Atletico hian an hmelma club hnena kaltir an phal lo a ni.

Alvarez hi Real Madrid pawhin lak tumin an lo dawr tawh a, mahse, Atletico hian an lo hnar nghal avangin an dawr nawn lo. Barcelona pawh hian euro maktaduai 100-in Alvarez hi lakluh an tum a, mahse, Atletico hian an hnar a ni mai lo - FIFA leh Royal Spanish Football Federation hnenah Barca hi an hek!

Atletico chuan Barca hi dan lo anga an player lo dawr ruah an puh a ni. Hetiang boruak karah hian Arsenal pawh an lo lang ve a, Atletico hian Gunners hnenah £128mtd-a hralh an phal thu an lo hrilh. Mahse, amah Alvarez ber hian Barca lo chu pan a duh lo a, transfer tawp thlengin club thar a neih loh phah.

Hemi chungchang hi Dani Olmo chuan sawi chhuakin, "Atletico dinna hi ka hrethiam lo. Tu pawhin duhthusam leh beisei kan nei vek a, Julian pawh a thil duhah a chiang hle.

"A duhthusamte a tak ram a chan theih nan theihtawp a chhuah a, a tih tur chu a ti tawh. Mahse, a tawpah chuan kan tih theih piahlam thil a awm ṭhin a, sawi zui tur a awm lo," a ti a, Argentine striker chu a lainat hmel hle.