German Cup-ah Bayern an chak nghal

Nilaini zan khan DFB Pokal first round khelh niin, champion lai Bayern Munich chuan 4-1 in VfL Osnabruck an hneh a, Vincent Kompany hoten harsatna nei loin second round an inpetkai.

Bayern tan Harry Kane-a'n goal hnih a khung a, Tom Bischof leh Michael Olise ten goal khat ve ve an khung bawk. Osnabruck tan Robin Meissner-a goal khung chu scoreline cheimawina chauh a ni.

Bremer Brücke, Osnabruck-a inkhelah mualneitu team tan Meissner-a'n minute ngana lekah an hmahruaina goal a khung a, German forward goal khung hi ropui hle mah se Bayern chhaih kawlhtu mai a ni.

Goal an chhuah hnuah Bayern an ṭha sawt a, minute 18-naah Kane-a'n an siphurh sutin minute ruk hnu lawkah Bischof-a'n an hmahruaina goal a khung a, 2-1 a hmahruai chungin chawlhlawk an hmang.

Second half-ah dan pangngaiin Bayern-in inkhel an thunun a, Olise-a'n tawih taka an goal thumna a khung hnuah Kane-a'n a tawp a khar a, nuamsa takin Bayern an chak.

Inkhelh banah Kompany chuan, "Kan khel ṭha takzet a, a bikin Bischof a chet ṭhat avangin ka lawm. Leon Goretzka leh Joao Palhinha ten min chhuahsan mah se, midfielder dang kan mamawh lo a, kan neih saah kan lungawi," a ti.

Bayern hian September 5, Inrinni zan dar 10:00-ah Schalke an tlawh dawn a, chawlh an neih rei loh avangin thlamuang taka awm hman an ni lo.