Clippers leh Kawhi an hrem

Los Angeles Clipper chu an player Kawhi Leonard hlawh pek dan chungchangah, dan an bawhchhiat avangin NBA chuan dollar makataduai 30 an chawitir a, 2029 leh 2033 inkara draft-ah first round pick panga an hloh dawn. Hei bakah hian Leonard-a'n $700,000 a chawi dawn bawk.

Kum 35 mi Leonard hian 2019-a Clippers a zawm lai khan, NBA chuan team pakhatin an player te hlawhah $109.140 mtd aia tam sen an phal lo. Kawhi hian kum thum atan contract ziakin a season khatnaah $32.7mtd bawr vel a hlawh nghal a, a contract a hman zawh meuh chuan $103.14mtd a hlawh thei dawn.

American forward hlawh hian Toronto Raptors champion pui zo hlim a nih avangin a hlawh hnem a, mahse player hlawh hnem dang Paul George leh Patrick Beverley te an awm ve avangin Clippers hi 'Salary Cap'-ah an buai.

Leonard-a'n Clippers an zawm tirh hian, company pakhat Aspiration nen $28mtd man hu contract a ziak tel. Mahse Aspiration neitu zingah Clipper neitupa Steve Ballmer chu a tel ve tih hmuhchhuah a ni a, hlawh bituk zat an pelh loh nan Kawhi chu infiamna pawn lama sum peah an ngai.

Nikum September aṭang kha chhuina an nei ṭan a, Clippers leh Leonard hi thiamloh chantirin pawisa an chawitir ve ve bakah club neitu Ballmer chuan inrawlhna thuk tak a lo neih ve avangin, thla 12 chhung league bakah team thil tiha inhnamhnawih lo tura hrem a ni bawk.

San Antonio Spurs tan pawha khel tawh Leonard chuan, "Kan tih tihsual avangin pawi ka ti a, min hremna pawh hi ka pawm thlap. Mahse ka ṭhian leh chhungkhat lainate bakah min ṭantute a nghawng erawh a pawi ka ti.

Clippers nen inremna kan neih lai khan rilru thianghlim tak puin, ṭha taka inkhelh chauh kha ka ngaihtuah. Tuman salary cap pumpelh dan kan ngaihtuah lo.

Kum 15 ka inkhelh chhungin ka chhungte, ka teammate te leh basketball hi ka ngaih pawimawh ber a ni ṭhin. Toronto-a ka let leh hnuah ka thunun theih chauhteah ka insawrbing tawh a, he thubuai hi kalsan a rilru thar pua hmalam pan ka tum a ni," tiin instagram-ah a post.

NBA Finals MVP vawi hnih lo ni tawh hian a club hlui Raptors a pan leh dawn a, kum sarih hnua Kawhi-a'n Eastern Conference a khelh leh theih nan Raptors hian Brandon Ingram, Gradey Dick, leh draft picks eng emaw zat chân an huam.

Kum 2019-a Leonard-a'n a vawi khatna atana a lo champion pui hnuah, Raptors hian beisei an phak lo chhunzawm a, nikum khan Conference playoff-ah Cleveland Cavaliers hneh loin an tla.

Kuminah erawh vawi hnih lo champion tawh Kawhi a kir dawn a, an champion ṭuma an chakna point score tu an neih leh tawh dawn avangin beisei an nei sang sawt ang.