Tlai dar 2:30-ah Zo Clasico

Star Cement MPL13-ah vawiin chawhma dar 2:30 hian Dinthar FC leh Chanmari FC te an inkhel dawn. Durtlang Football Stadium lamin MPL fixture ṭha ber zinga mi Zo Clasico an chang a, Dinthar leh Chanmari mipui bakah Durtlang mipui inkhel en tur ṭhahnem tak an thawhchhuah a rinawm.

MPL ṭantirh lamah Zo Clasico boruak sang ṭhin a, tun hnaiah erawh Chanmari FC an chungnung deuh avangin boruak a alh leh thei lo. Chutihrualin tun ṭum inkhel tur erawh en châkawm chhan a awm a, Rochhingpuia hoten phuba lak châkin Durtlang Stadium an pan ang.

Kumin I Day Football-ah khan Dinthar FC-in Chanmari FC hi 3-1 in an hneh. Coach Laldampuia hote tan K Vanlalhmunmawia, Lalbiakzuala leh Lalremtluanga ten goal khat ṭheuh an khung a, Chanmari tana Aron Vanlalrinchhana goal khungin an mualpho tur a hliah khung phah lo.

IFL club Chanmari tan chak loh a tlawm thlak a, an hmelma Dinthar FC laka tlawm a na lehzual. Hei vang tak hian Chanmari hi siruk lain an thawk chhuak dawn a, an khingpui tur Dinthar erawh Saikhamakawn laka 3-0 a chak lo hlim an ni a, insiamṭhat an mamawh viau thung ang.