Mizoram dinhmun a hriat dawn

Junior Boys’ National Football Championship for Dr. B.C. Roy Trophy 2026-27-ah Mizoramin tukin zing dar 8:15 hian ṭhenawm state Meghalaya an hmachhawn dawn a, coach Lalrindika Khiangte hote hian point an hlawh chhuak a nih chuan semifinal an lut ang.

Mizoram hian match hmasa berah Maharashtra 2-0 in an hneh a, Tamil Nadu lakah 7-0 in an chak leh bawk. An khingpui tur Meghalaya pawh hian Tamil Nadu (2-1) leh Maharashtra (3-0) lakah hnehna an chang ve ve bawk.

Bengaluru Football Stadium-a inelna neihah hian group khat aṭangin team khat chauhin semifinal an lut dawn a, Mizoram dinhmun hi ṭha viau mah se Meghalaya laka an tlawm a nih chuan an tla thei thung.

Mizoram hi group C-ah an awm a, semifinal an lut a nih chuan gorup A pakhatna Manipur nen September 7, Thawhṭanni hian semifinal an khel dawn. Manipur hian Assam leh Kerala an hneh hnuin nimin khan Telangana nen 1-1 in an inhnehtawk a, pakhatna dinhmun an luah. Final hi September 9, Nilainiah khelh tur a ni a, West Bengal-in final an lut tawh a ni.