Police tan Republic Vengthlang tlangval

Star Cement MPL13-ah Mizoram Police-in Malsawmfela leh Isaak Malsawmkima te goal hmangin Saikhamakawn 2-1 in an hneh a, goal luh nan Republic Vengthlang tlangval B. Rosangliana a pawimawh hle. Coach Lalbiaksanga Colney hote hian an elpui SKK an hneh avangin table-ah pahnihnaah an invawrchho hial a, vawiin inkhel a zirin tlahniam thei mah se palina hnuai lamah erawh an tla thei tawh lo.

Durtlang Football Stadium-ah Ramhlun South striker Malsawmfela leh Rosanga Betlu te an inthlawp ṭha nawn a, Ramthar Veng laka goal ropui khungtu Sawmfela'n SKK lakah pawh goal ṭha a khung. Rosanga ball pek chu Sawmfela'n box pawn aṭangin goal kilah tak a pet lut.

Dinthar laka 3-0 a chak zo hlim Saikhamakawn lamin an nawr let a, Police lamin beh an tum chuang lo. Team pahnih an inhnehtawk a, chance an inneih chhawk a, Police-in goal chance an ngah hret. Second half-ah erawh SKK goal nawr a na a, K. Roluahpuia'n (K. Mama) ṭha taka lakluh hnuah a cross Dinthar laka hattrick siamtu K. Lalremmuana'n a tlawh lut.

VL Thanga hmangin SKK-in Police tlarhnung an rum ṭhaih a, goal erawh hmuh tur a awm tawh lo. Hun tawp dawn hnaiah Rosanga Betluin SKK midfielder Kiran Chhetri lakah penalty a hlawh chhuak a, Kolasib tlangval Isaka'n minute 80-naah Police chakna goal a khung.