Spurs squad-ah Richarlison tel lo

Tottenham Hotspur chuan Premier League squad-ah Richarlison an telh lo a, Brazilian striker hi a chhuak ngei dawn niin a lang ta - Turkey leh Saudi Arabia hming lam rik a ni.

Spurs manager Roberto de Zerbi chuan kar hmasa khan, a player hian chhuah a dil thu a sawi a, Trabzonspor hming an lam ri zui. Mohamed Salah la luttu team hian Spurs hi vawi hnih an dawr tawh nia sawi a ni a, an hnar ve ve - pound maktaduai 35 tal Spurs hian hmuh an beisei.

Hetihlai hian Turkish Super Lig hi nizan khan transfer khar a ni a, he thu buatsaih a nih lai hian Richarlison dinhmun a la chiang lo. Saudi Arabia lamah pawh a kal mai thei nia sawi a ni a, Saudi hian September 6, Pathianni thleng transfer an hawng thung.

Kum 29 mi forward hi a club hlui Everton nen pawh sawi zawm a ni hman a, mahse, transfer tawp niin a nang hman a, Merseyside club-ah a kir ta lo. Richarlison hma hun a chiang lo a, tun nipuia a chhuak hman lo a nih chuan inkhel mang loin January a nghah thlen a ngai dawn tihna a ni!

Spurs hian tun nipuiah sum an hmang na hle - player lakluh nan £313mtd ngawt an hmang a, mahse, an league match hmasa pahnihah Brentford (3-0) leh Newcastle United (2-0) an ngam lo a, zanin dar 7:30-ah Nottingham Forest an lenchilh ang.