Felix-a'n MLS a chakpui

Star Cement MPL13-ah Lawngtlai club MLS FC-in chak hmel an hmu ta a, nimin chhun khan Kanan FC 3-0 in an hneh. Durtlang Football Stadium-a inkhelah MLS tan Felix Lalruatsanga'n goal hnih a khung a, Lalfamkima'n goal khat a khung ve bawk.

Table mawngphah pahnih inkhelah minute 45 chhungin goal a lut lo. Second half-ah Serchhip tlangval Felix-a'n six yard pawn chiah aṭangin Kanan midfielder Melvin Zomuana pet sual chu a tauh lut. Kanan tlarhnung a pherh zui a, minute 76-naah Lalhruaitluanga thawhrah sengin FK-a'n a khung belh.

Goal hmaah Kanan aiin MLS an hlauhawm zawk a, minute 78-naah vei lam aṭanga C. Lalmuanzuala cross chu Felix-a'n a tauh lut. MLS 3-0 in an chak a, point li hmuin table-ah palinaah an awm chho. Kanan erawhin point an la hmu lo a, table mawngphahah an awm chhunzawm a ṭul ta thung.