Maresca hi top manager a ni - Enzo

Manchester City midfielder thar, pound maktaduai 125-a Manchester khaw club zawmtu, Enzo Fernandez chuan City boss Enzo Maresca chu top manager a nih thu a sawi a, Italian coach chungah beiseina sang tak a nei.

Chelsea aṭanga City pantu Enzo hian September 2, Thawhlehnia transfer tawp niah khan City hi a zawm a, a phur hle. Enzo chuan, "A nihna dik tak sawi ta ila, Maresca hi top manager a ni.

"Chelsea-ah kan lo thawk dun tawh a, hun hlimawm tak tak kan tawng dun. A hnen aṭang hian thil tam tak ka zir a, Latin mi ang ve tho ni berin ka hria a, football hi a âtchilh tlat. Ka tan chuan a ni thawhpui hi a nuam hle," a ti a, a coach thar a fak.

Enzo hi Chelsea boss thar Xabi Alonso-a'n cham turin duh mah se, a hmin zo lo a, City lamah a pu hlui, Chelsea-a amah lo kaihruai tawh ṭhintu Maresca hnungzui a duh tlat.

Argentine midfielder chuan, "Maresca hian City ka pan theih nan theihtawp a chhuah tih ka hria a, ka lawm hle. Amah chauh ni loin, keipawhin thawh dun leh hi ka châk ṭhin a, mahse, a awlsam lo.

"Maresca-a'n theihtawp a chhuah a, club hotute a dawr a, a chungah ka lawm takzet. Hun rei tak kan nghak a, a tawpah chuan City ka zawm thei ta," a ti - City hian coach thar Maresca hnuaia an match hmasa pahnihah hnehna an chang ve ve.

Zanin dar 7:30-ah City hian Premier League kai thar Coventry City an mikhual dawn a, Frank Lampard enkawl team hian league match hnihah chak an la nei lo - zaninah thih tha nen, chak tumin an bei dawn.

City hian midfield-ah Elliot Anderson leh Ayyoub Bouaddi an la thar bawk a, Enzo a awm belh tâk bawk avangin an inrem dan tur hi hmuh a châkawm ta hle. City hian transfer tawp niah Iliman Ndiaye an la lut bawk a, zaninah bul a ṭan dawn em, a la hriat loh.