Musiala-a'n training a zawm leh tawh

Bayern Munich midfielder Jamal Musiala chuan club training a zawm leh tawh a, thluak lam harsatna a neih avanga a tluk hnua a training leh hmasa ber a ni. German midfielder hian zanin dar 10:00-a Schalke an hmachhawn hunah a inlan mai thei niin khawthlang chanchinbute chuan an ziak.

Kum 23 mi Musiala hian August 15-a RB Leipzig nen friendly match an khelh ṭum khan a tlu a, a tluk chhanah khaw lum chu mawhpuh ber a ni. An inkhelh ṭum hian khaw lum zawng chu 33°C - 35°C a kai pha hial.

Mahse ni thum hnu lawkah Heidenheim an hmachhawn ṭumin a tlu leh a, zawn chhuah ngai lo mah se endik a nih hnuah 'neurological dysfunction' (thluak lam fel lo) a nei tih hmuhchhuah a ni a, enkawl nghal a ni.

Musiala chuan, "Thluak lama buaina ka nei tih hmuh chhuah a ni a, Leipzig leh Heidenheim laka thil thleng ang hi a thlen tir leh thei a ni. A tirah kha chuan ka hlau hle a, mahse ka tan chuan ka nitin nuna thil pakhat ang lek a ni.

Mi thiam tak takte enkawlna ṭha tak ka dawng mek a, a thim zawngin engmah ka thlir lo. Bayern, ka chhungte leh ka ṭhianten bakah fans thlawpna ka dawn reng avangin ka thla a muang hle," tiin instagram-ah a sawi.

Nilaini zana Bavarians-in DFB Pokal an khelh ṭum khan board member Max Eberl chuan, Musiala damlohna chu tihreh nghal theih a ni bik lo a, mahse ziaawm lam a pan theihna hma an lak mek thu a sawi.

Hetihlai hian coach Vincent Kompany chuan Musiala tan Schalke hmachhawn chu a la hma mah mah a tih thu a sawi a, a midfielder chu pressure pek a tum loh thu a sawi bawk.

Belgian coach chuan, "A rawn ṭhat chhoh avangin ka lawm hle a, mahse a inkhel leh nghal chuan a daih rei dawn lo. Chu chu amah bakah team-in kan tuar leh ngei dawn," a ti a, la chawl hahdam turin a duh.

Musiala hian nikum Club World Cup-ah Gianluigi Donnarumma nen an intihpalh avangin a ke ruh a titliak a, season liam ta khan match tam zawkah inlan thei loin season tawp lamah chauh a rawn kir.

A ke damna pawh rei a nih hmaa harsatna a tawh leh avangin Kompany-a'n chawl tur a duh hi a awm hle. Kompany thu anga an kal dawn a nih chuan zaninah Musiala a inlan a rinawm loh. Musiala bakah hian a hnampui Serge Gnabry chu hliam vanga inlan lo tur chiang sa a ni.