Italian GP a lum dawn

Pathianni zan dar 6:30-a neih tur Italian Grand Prix chu, ram chhung khaw lum a zual vangin motorsports thuneitu sang Fédération Internationale de l'Automobile (FIA) chuan 'heat hazard race' a puang. Driver tam tak tan khaw lum hnuaia intlansiak hi thil awlsam a nih dawn loh avangin ngaihven a hlawh.

Khaw chin thlirlawknaah 31°C aia a lum dawn chuan FIA-in heat hazard race hi a puang ṭhin a, Italy-a an tlanna tur Monza hi khaw lum lai tak niin Nilaini khan 36°C a kai hial.

FIA-in heat hazard race a puan takah chuan team tina driver zawng zawngten an car-ah, boruak uap lutuk laka an intihdaihna tur hmanrua an dah leh thei dawn a, thuneitu lam pawhin dan angin hemi avang hian car rih zawng bituk zat chu kg ngaa a pelh an phal dawn.

Hetiang thuchhuah siam a nih car chhung chu 40°C te a nih ṭhin avangin, driver te chu anmahni vawng daitu tur a bik taka siam kawr ha tura tih an ni ṭhin an ni bawk.

Driver ṭhenkhat chuan 'cooling system' an vuahin, an awm a tihnawm loh zawk avangin an dah duh lo ṭhin a, kawr hak chauh duhtawk an tam thei hle. Italy hi tun season-a heat hazard race an puan vawi hnihna chiah a ni a, June thla khan Austrian GP-ah an lo puang tawh bawk.

Red Bull driver Max Verstappen chuan kumin Italian GP chu a harsat a rin thu a sawi a, fimkhur taka an tlan a ngaih tur thu a sawi bawk. Dutch GP neih zawh taka beisei a phâk loh hnuah Verstappen a ṭang hle.

Kum 28 mi Verstappen chuan, "Monza-a kan inelna tur hi a harsa dawn hle a, mahse hemi tur hian taksa leh rilru lamah inbuatsaihna ka lo nei tawh. Mahse tum ṭum hi chu inelna dang aia a danglam dawn avangin fimkhur a ngai dawn," a ti.

Dutch driver hian season hmasa khan Italian GP-ah hnehna a chang a, kuminah Autodromo Nazionale Monza-ah pawh en hlawh bik a nih leh dawn. Chutihrualin Verstappen hi chetsual a ching a, champion a tum a nih chuan a hma ai fimkhur lehzuala a tlan a ngai ang.

Drivers table-a hmahruaitu Andrea Kimi Antonelli-a'n ngaihven a hlawh leh dawn bawk a, drivers table-a hmahruaitu hian an ram leilungah ngei chak a tum dawn avangin team dang tan a huphurhawm leh dawn.