Rockets-in Thompson thlung nghet

Houston Rockets chuan an player Amen Thompson thlung ngehtin, kum nga dang châm chhunzawm turin contract an ziahpui. Houston-a kum nga a awm chhung hian dollar maktaduai 208 a hlawh dawn a, kum tin $41.6 mtd a hlawh pha dawn.

Kum 23 mi Thompson hi 2023 khan a unaupa Ausar nen draft-ah an tel a, Rockets chuan Amen hi thlangin a unaupa erawh Detroit Pistons-in an club-a khel turin an thlang thung.

NBA-a a season hmasa berah Thompson hi Rockets-in an ring ngam nghal a, match 62 zet khelin vawi 23 inkhel bul a ṭan bawk. Hemi kum hian NBA All Rookie second team-ah a lang pha bawk.

Kum thum Rockets-a a awm chhungin match 210 zet a khel tawh a, team innghahna pakhat a ni tawh. Team danga insawn loa a châm tur hi Rockets ṭantute tan chanchin lawmawm a ni.

Season hmasa khan American forward hian match tinah point 18.3 leh assist 5.3 nei ziah ang a ni a, 2024-25 season khan NBA All Defensive First-ah thlan a lo ni tawh bawk a, defence lamah pawh a duai lo hle.

Rockets hian an player pawimawh Alperen Sengun leh Kevin Durant te an la kawl a, Thompson-a'n contract thar a ziah bakah Bogdan Bogdanovic, Marcus Smart, Bruce Thornton, Oscar Tshiebwe, Julian Phillips, Sean Pedulla leh Rafael Castro te an la lut bawk.

Season hmasa khan Western Conference playoff-ah Los Angeles Lakers an hneh lo a, kuminah erawh indintharna tenau an neih avangin Rockets hian season thara champion an inbeisei ngam ang.