Inter-ah Martinez a hlim

Argentine forward Lautaro Martínez chuan transfer lai khan, Spanish club lian Barcelona-in an dawr ngei tih a sawi a, mahse Inter Milan-ah a hlim avanga chhuah a tum loh thu leh châm chhunzawm zel a thlang tih a sawi

Kum 28 mi Martinez chuan, "Thu leng vel kha thu dik tak a ni a, Barca khan min lak luh an duh. Mahse he lai hmun hi nuam ka ti a, Inter-in mi mamawh chhung chu khel zel turin ka inpeih. He club tan hian thil ropui tak tih tur ka la nei a ni," a ti

Barça chuan Argentine forward tho Julian Alvarez lak luh an tum a, mahse Atletico Madrid-in hralh an phal loh avangin striker dang an dap a, Martinez hi an duh ber zinga mi a ni.

Martinez hian chhuah tumna a neih loh bakah San Siro-ah 2029 thleng contract a la nei a, Catalan club pawhin khaw dang hawiin Gabriel Jesus chu Arsenal aṭangin an la lut.

Season hmasa khan Martínez hian inelna hrang hrangah goal 22 khungin assist paruk a nei a, Inter-in Serie A nomawi an chawina kawngah a thawk hlawk hle.

Inter hian 2025 khan Champions League final an lut a, 2010 hnua a vawi khat nan champion inbeisei mah se Paris St-Germain lakah 5-0 ngawtin an tlawm. Season hmasaah rin loh takin round of 16 playoff-ah Norwegian club Bodo/Glimt an hneh lo bawk a, kuminah erawh sang tak thlen an inbeisei leh ngam tawh.

Zanin dar 9:30-ah Inter hian Napoli an mikhual dawn a, Cristian Chivu-a naute hi champion lai ni mah se Napoli hi champion tum ngam khawpa player nei ṭha an nih avangin inkhel hmuhnawm a beisei ngam.

Inter tan an player thar John Stones leh Curtis Jones te an khelh theih a rinawm a, English player pahnih hi Cagliari lakah pawh an inlan tawh. Hetihlai hian Napoli midfielder pawimawh Scott McTominay an zai avangin a khel thei dawn lo a, Kevin De Bruyne hoin khualmualah hnehna chan an tum ang.