Barca khelh dan nen kan inmil - Rodri

Spanish champion Barcelona midfielder thar Rodri chuan, Camp Nou a pan chhan chu an khelh dan nen a inmil vang a nih thu a sawi a, chona thar hmachhawn turin Barca chu hmun dik tak a nih thu a sawi

Kumin World Cup khelh zawh takah khan kum 30 mi Rodri hian an ram a champion pui a, Golden Ball dawngin Spain innghahna a ni. Inelna a zawh hnuah Real Madrid-in lak an tum nghal a, mahse a tawpah Catalan club a zawm ta zawk a, Barca-in an lak theih nan Pep Guardiola a inrawlh bawk.

Spanish midfielder chuan, "Barca hi an khelh dan nen kan inmil thlap avangin ka pan a, he hmunah hian nomawi chawi tam tak chawi ka tum dawn a ni. Ram tana ka khelhpui ṭhin tam tak an awm ve bawk a, a ni khatna aṭangin ka mikhual lo hle," a ti.

Rodri hian Barca tan match hnih a khel ve tawh a, mahse bul a la ṭan lo thung. Athletic Bilbao leh Rayo Vallecano te an hneh ṭumin bench aṭangin a lut a, a pumpuiin minute 40 bawr vel bak a la inkhel lo.

Coach Hansi Flick-a'n Rodri season khata match 60 chuang khel turin a beisei lo nia sawi a awm a, World Cup zawh hnu lawk khan a hnung an zai avangin a awm lo hran lo. Mahse Rodri position-ah hian Marc Bernal, Pedri leh Gavi te an awm avangin manganna tur a awm lo.

Pathianni zan dar 7:45-ah Barca hian Valencia an lenchilh dawn a, an midfielder Gavi chu hliam vangin a inlan thei dawn lo a, Frenkie de Jong dinhmun a chiang lo bawk. Manchester City midfielder hlui hi Flick-a'n bul a ṭantir a rinawm tawh a, a hun ṭha neih bawhpelh a duh lo ang.

Barca hian season kal mekah match thum khel tawhin an la chak vek a, goal 12 khung tawhin an lamah goal hnih chauh a la lut. Valencia lakah hian Rodri bakah a teammate hlui Gabriel Jesus a inlan thei tawh dawn a, goal an khung hnem a nih pawhin thil mak a ni lo ang.