FA Cup Arsenal naupang an chak
English football-a inelna ngaihhlut hlawh FA Cup fourth round-ah Thawhṭanni zan khan Arsenal an inlan a, London club hian an mikhualna ramah AFC Bournemouth chu 2-1 in an hneh.
Arsenal boss Mikel Arteta-a'n player naupang rual khelhtir chungin 'risk' a la a, kum 18 mi Bukayo Saka leh kum 20 mi Eddie Nketiah-ten Gunners tan goal an khung. Bournemouth tan bench aṭanga luhtir Sam Surridge chuan hun pek belhah goal khat a khung ve a, mahse injury time a nih tawh miau avangin si phurh sut zawhna hun a awm lo.
Laipui a puak
Arteta-a'n player naupang rual a luhtir chungin mikhual khelmuala goal khung turin hun an mamawh rei lo a, Joe Willock leh Gabriel Martinelli te hnathawh zarzoin Saka chuan minute ngana lekah goal hmahruai a khung.
Minute 26-na a ni a, goal khungtu Saka chu goal siamtuah a ṭang ve thung - Nketiah chuan a ṭhianpa duhsakna hi goal hmangin a chhanglet a, minute 30 pawh a tlin hmain 2-0 in hma an hruai der. Kum 20 mi Nketiah hian Leeds United-ah season chawhma lam kha chu loan-in hun a hmang a, match 19-ah goal nga a khungsak hman.
Minute 90 chhung goal dang a lut lo a, chak tur a chiang - hun pek belh minute linaah Surridge chuan Bournemouth tan a rawn khung ve a, Arsenal dinhmun sawi nghing turin hunin a daih tawh lo.
Arteta 'magic'
Khelmual sirah Arteta a 'active' a, a player-te khelh dan tur hrilhin a au reng a, kut zaizir hmangin a be reng bawk - chutianga ti ṭhin manager langsar pakhat chu Pep Guardiola a ni a, Arteta hi Spanish manager ropui hnuaia inzir a ni tih hai rual a ni lo.
Manchester City-in passing game mawi tak pho chhuakin pressing game an khel ṭhin a, Arteta hian he 'style' hi Arsenal-ah chhawm a tum tih a chiang a, Cherries laka Gunners game a mawi hle. Chutihruala hriat tel tur erawh City ang taka khel chhuak turin erawhin Arsenal-in hun an duh ang tih a chiang a, tuna a player neih dan enin Arteta hian a duh ang game khel chhuak turin nipuia bazar a mamawh ang tih a chiang bawk. Arteta hian player beiseiawm Martinelli, Saka, Willock leh Matteo Guendouzi te a kawl tel tih hriat tel a ṭha a, beisei an phak a nih phawt chuan London club hma hun a êng.