Osaka khingpui tur Rybakina

US Open-ah hmeichhe player langsar ho an che ṭha. Last 16 lut zingah vawi hnih champion tawh pahnih Aryna Sabalenka leh Naomi Osaka bakah vawi khat champion tawh Coco Gauff leh Iga Swiatek te an la dam.

Japanese nula Osaka hian kum 2018 khan Serena Williams hnehin nomawi a chawi tawh a, kum 2020-ah Victoria Azarenka hnehin a champion leh bawk. Kum 28 mi Osaka hi tun ṭum inelnaah seeded 13-na a ni a, last 16 lut turin nimin zing khan Elise Mertens chu 6-3, 3-6, 7-5 in a hneh hram.

Inkhelh banah Osaka chuan, "Dik tak chuan ka khel ṭha tawk lo a, keimah pawh ka hnual phah hle. Ka chet danah pawh a ṭha lo a, ngaihdam ka dil. Naupang ten kan inkhel an en ṭhin si a, pawi ka ti hle," tiin ngaihdam a dil.

Second set an khelh laiin Mertens hian 2-1 in hma an hruai a, Osaka hian break point vawi thum a hmang ṭangkai lo. Hemi hnu hian Osaka hi a insum zo lo a, a racket pawh chhuatah a vawm. Japanese nula hian hnehna a chang leh ta ho a, inkhelh banah a chet dan avangin ngaihdam a dil.

Osaka khingpui tur Elena Rybakina erawh straight set-in a chak a, seeded no. 2 Rybakina hian Yulia Starodubtseva chu 7–6(8–6), 6–3 in a hneh. Kumin August thla khan Toronto-ah player ṭha pahnih hi quarterfinal-ah an inhmachhawn a, Rybakina hi 4-6, 7-6 (7-5), 6-4 in a chak hram.