Spurs an la chak thei lo

Pound maktaduai 300 chuang seng mah se, Tottenham Hotspur an la chak thei lo. London club hian league match thum an khelh tawh aṭangin point khat chiah an la hlawh chhuak - Inrinni zan khan Nottingham Forest chu 0-0 in an inhnehtawkpui!

Spurs hian an match hmasa berah Brentford chu 3-0 a ngam loin, Newcastle United lakah 2-0 in an tlawm zui a, tunah Nottingham Forest chu goal khung loin an inhnehtawkpui leh ta.

Tottenham tana chance ṭha bera chhal ngam chu Micky van de Ven-a'n a tauh lut thei lo a, Manchester City aṭanga lakluh pahnih, Savio leh Omar Marmoush te pawhin a vawi khat nan bul ṭan dun mah se, a pawimawh ber goal an khung thei lo.

Forest hian Neco Williams hmangin chakna goal khung ang hialah an inngai hman a, mahse, Spurs defending pherh karah Williams hian a kutin ball a tawk fuh hmasa a, handball vangin pawm a ni lo - Spurs an vannei takzet.

Hetihlai hian coach Roberto de Zerbi chuan, "Player ṭha tak tak kan la lut ngei a, video games ang maia awlsama team din erawh thil theih a ni lo. Kan result avangin ka lawm lo a, kan khelh danah erawh ka lawm thung.

"Ningani khan a vawi khat nan training kan nei ho ve chauh a, hmasawn zel kan la ngai. Tlarhnungah kan ti ṭha thawkhatin ka hria a, ball pawh kan keng ṭha thawkhat viau. Mahse, goal hmaah erawh kha aia kan hriam a ngai," a ti a, hun an la duh thu a sawi.

Spurs hian Forest lakah ball chang tam zawkin, shot vawi 11 ngawt nei mah se, goal zawnah a kal miah lo! De Zerbi-a sawi angin insiamrem turin hun an la mamawh a, an mamawh rei lutuk erawh chuan an chesual ang - hei chu Premier League a ni tlat.